Հայաստանի տնտեսությունն օդի ու ջրի նման կախված է արտահանման ծավալներից, որոնք էլ հենց ապահովում են արտարժույթով, ինչպես նաև զարկ են տալիս ներքին տնտեսական կյանքի աշխուժացմանը: Հայաստանի արտահանման ուղղություններն այդքան լայն չեն, սակայն հետաքրքիր է, որ մեր երկիրն արտահանում է նաև պարենամթերք: Այո, պարենամթերքի մի շարք ուղղություններով երկիրը կարողանում է ոչ միայն ապահովել ներքին սպառում, այլ նաև արտահանում:
Ստորև բերված գծապատկերի օգնությամբ ծանոթանանք պարենամթերքի արտահանման ծավալներին՝ ըստ տարբեր ուղղությունների.
Գծապատկեր 1. Պարենամթերքի արտահանման ծավալները՝ 2022 թ.-ի երկրորդ եռամսյակում
Հայաստանը 2022 թ.-ի երկրորդ եռամսյակում արտահանել է 26,691․5 տոննա ծավալով միրգ։ Ընդ որում՝ արտահանվել է 82,7 տոննա խաղող։
Երկրորդ տեղում է կոնյակի արտահանումը՝ 17,901.3 տոննա ծավալով:
Երրորդ հորիզոնականում է հայտնվել հանքային ջուրը, որի արտահանման ծավալները կազմել են 10,875․7 տոննա: Հայաստանն արտահանում է նաև պանիր՝ 391.5 տոննա և գինի՝ 1,641.4 տոննա:
Ուսումնասիրենք նաև՝ ինչպես են փոխվել պարենամթերքի արտահանման ծավալները 2022 թ.-ի երկրորդ եռամսյակում՝ առաջին եռամսյակի և 2021 թ․-ի նույն եռամսյակի համեմատ.
Գծապատկեր 2. Պարենամթերքի արտահանման ծավալների փոփոխությունը 2022 թ․-ի երկրորդ եռամսյակում՝ առաջին եռամսյակի և 2021 թ․-ի նույն եռամսյակի համեմատ
Վիճակագրական տվյալները փաստում են, որ 2022 թ․-ի երկրորդ եռամսյակում 2021 թ․-ի նույն եռամսյակի համեմատ արտահանման ծավալների 6% զգալի աճ է դիտվել հանքային ջրի մասով:
Խորը անկում դիտվել է պանրի արտահանման ծավալներում: Վերջիններս 2022 թ․-ի երկրորդ եռամսյակում 2020 թ․-ի նույն ժամանակահատվածի համեմատ կրճատվել է 59%:
Կոնյակի և գինու արտահանման ծավալների աճը 2022 թ․-ի երկրորդ եռամսյակում 2020 թ․-ի նույն եռամսյակի համեմատ կազմել է համապատասխանաբար 4% և 2%: Նկատենք նաև, որ մրգի բաժնում գտնվող խաղողի արտահանման ծավալները 2022 թ․-ի երկրորդ եռամսյակում 2021 թ․-ի նույն եռամսյակի համեմատ կրճատվել է 25%-ով։
