Լաբորատորիայի հիմքն արդեն դրված է. Ինչ կարող է այն տալ ՀՀ-ին

ՀՀ բարձր տեխնոլոգիական արդյունաբերության նախարարի տեղակալ Ռուբեն Սիմոնյանը փետրվարի 13-ին այցելել է Reactive Science ընկերության կողմից Չարենցավանում հիմնադրված լաբորատորիա։ Այս մասին հայտնում են ԲՏԱ-ից:

Reactive Science ընկերության թիմը 2022 թվականին իրականացված «Ներուժ 3.0» սփյուռքի տեխնոլոգիական ստարտափների ծրագրի հաղթողներից է, որը ժյուրիի գնահատման արդյունքում գրավել էր 2-րդ տեղը՝ ստանալով 15 մլն ՀՀ դրամի չափով դրամաշնորհ:

Ընկերության ներկայացրած գաղափարը լաբորատոր ռեակտիվների արտադրությունն էր, որն օգտագործվում է մոլեկուլային կենսաբանության (PCR), կենսաքիմիայի և իմունային ախտորոշման փորձարկման համար:

Ընկերությունն արդեն առաջին քայլերն է անում ներկայացված գաղափարը կյանքի կոչելու ճանապարհին. լաբորատորիայի հիմքն արդեն դրված է, առաջիկայում նախատեսում են նաև արտադրություն սկսել։

Ռուբեն Սիմոնյանը շրջայց է կատարել լաբորատորիայով, ծանոթացել սարքավորումներին և իրականացվող աշխատանքներին։ Ընկերության տնօրեն Վահե Օհանյանը, որը ծրագրի արդյունքում ԱՄՆ-ից տեղափոխվել և բնակություն է հաստատել Հայաստանում, նախարարի տեղակալին է ներկայացրել նորաստեղծ լաբորատորիայի հնարավորությունները, որոնց սարքավորումների մի մասը ձեռք է բերվել ստացած դրամաշնորհի միջոցներով։

Ծրագիրը պիլոտային է, առայժմ այն տեղայնացվում է Հայաստանում, հետագայում նախատեսում են գործունեությունն ընդլայնել տարածաշրջանում ու ամբողջ աշխարհում։