Հնդկաստանը կկարողանա իր նավթի կարիքները բավարարել այլընտրանքային աղբյուրներից, եթե երկրորդային պատժամիջոցները հարվածեն ռուսական մատակարարումներին, վստահ է նավթի նախարար Հարդիպ Սինգհ Պուրին։ Այս մասին հաղորդում է Reuters-ը։
Այս շաբաթվա սկզբին ԱՄՆ նախագահ Դոնալդ Թրամփը զգուշացրել էր, որ ռուսական նավթ գնող երկրները կարող են պատժամիջոցների ենթարկվել, եթե Մոսկվան 50 օրվա ընթացքում չհասնի Ուկրաինայի հետ խաղաղության համաձայնագրի։
Պուրին կարծում է, որ Հնդկաստանը կարող է լուծել ռուսական ներմուծման հետ կապված ցանկացած խնդիր՝ դիմելով այլ երկրների։ Նա նշել է, որ շուկա են մտնում բազմաթիվ նոր մատակարարներ։ Բացի այդ, Հնդկաստանը մեծացնում է հետախուզությունն ու արտադրությունը։
«Ես ընդհանրապես անհանգստացած չեմ։ Եթե ինչ-որ բան պատահի, մենք կհաղթահարենք», — ասել է Պուրին Նյու Դելիում կայացած արդյունաբերական միջոցառման ժամանակ։ «Հնդկաստանը դիվերսիֆիկացրել է իր մատակարարման աղբյուրները, և կարծում եմ, որ մենք մոտ 27 երկրներից գնումներից անցել ենք մոտ 40 երկրների», — հավելել է նա։
Ռուսաստանը մնացել է Հնդկաստանի խոշորագույն նավթ մատակարարը՝ կազմելով ընդհանուր մատակարարումների մոտ 35%-ը, որին հաջորդում են Իրաքը, Սաուդյան Արաբիան և Արաբական Միացյալ Էմիրությունները։
Բաժանորդագրվեք մեր ալիքին Telegram-ում
