ԱՄՆ-ի Պետդեպարտամենտը առաջարկել է $10 մլն նրան, ով տեղեկատվություն կտրամադրի BlackCat հաքերային խմբավորման վերաբերյալ։ Այս «ամենապահանջված» խմբավորումը մեղադրվում է UnitedHealth Group ընկերության տեխնոլոգիական ստորաբաժանման համակարգչային ցանցերը կոտրելու մեջ
ԱՄՆ-ի պետդեպի հաղորդագրությունում ասվում է, որ BlackCat-ը հզոր վնաս է հասցրել կենսական ենթակառուցվածքների համակարգչային ցանցերին ԱՄՆ-ում և ողջ աշխարհում։
UnitedHealth Group-ը արդեն նախորդ շաբաթ տեղեկացրել էր, որ սկսել է $14 մլրդի հասնող բժշկական ապահովագրական հայտերի հետ կապված խնդիրների կարգավորման աշխատանքները, որոնք առաջացել էին հաքերային հարձակման հետևանքով։
UnitedHealth-ի Change Healthcare տեխնոլոգիական ստորաբաժանումը պատասխանատու է բժիշկներին և նրանց բուժառուներին ապահովագրավճարների վճարման գործընթացի համար, իսկ հարձակումից հետո ստեղծվել էր մի իրավիճակ, երբ թե՛ բժիշկները, թե՛ բուժառուները մնացել էին առանց որևէ ֆինանսական միջոցների։
Հատկապես դաժան է եղել այն համայնքային առողջապահական կենտրոնների համար, որոնք սպասարկում են ավելի քան 30 միլիոն աղքատ և չապահովագրված հիվանդների։
Ավելի վաղ BlackCat-ի ավազակները $22 մլն փրկագին էին պահանջել համակարգը վերականգնելու դիմաց։ Սակայն, հայտնի չէ՝ արդյո՞ք ընկերությունը կատարել է հանցագործների պահանջը։
Բաժանորդագրվեք մեր ալիքին Telegram-ում
