Սպառողների շահերի պաշտպան ամերիկացի Ռալֆ Նեյդերը կոչ է արել չեղարկել Tesla-ի մեքենաներում Full Self-Driving (FSD) գործառույթը՝ դրա «վտանգավոր և անպատասխանատու գործողությունների» պատճառով։ Փոխանցում է Forklog.com-ը։
Նեյդերի խոսքով, Մայրուղիների երթեւեկության անվտանգության ազգային վարչությունը (NHTSA) պետք է պահանջի ավտոարտադրողից անջատել FSD-ն յուրաքանչյուր մեքենայի վրա։
Նեյդերը նշել է, որ տրանսպորտային միջոցների ավելի քան 100,000 սեփականատերեր մասնակցում են FSD բետա թեստավորմանը հանրային ճանապարհների վրա: Ընդհանուր առմամբ, Tesla-ն ամբողջ աշխարհում շահագործում է մոտ 3 միլիոն ավտոմեքենա:
Իրավապաշտպանը պնդում է, որ NHTSA-ն պետք է քայլեր ձեռնարկի, քանի դեռ ռոբոտացված մեքենան չի սպանել էլի որևէ մեկին։
Ավելի վաղ NHTSA-ն կազմել էր վթարների հատուկ հետաքննությունների ցանկը (SCI), որտեղ գործակալությունը տվյալներ է հավաքում ճանապարհատրանսպորտային պատահարների մասին, որոնք դուրս են տեղական իշխանությունների եւ ապահովագրական ընկերությունների իրավասությունների սահմաններից: Այսօր SCI-ի ցուցակում 48 վթար կա, որից 39-ը Tesla-ի ինքնակառավարվող ավտոմեքենաների մասնակցությամբ է եղել։ Գերատեսչության տվյալներով ՝ նշված ճանապարհատրանսպորտային պատահարներից զոհվել է 19 մարդ։