Որքան է կազմում ՀՀ սահմանային մուտքերի և ելքերի տարբերությունը. ցուցանիշները՝ ըստ քաղաքացիության երկրի

Հարավային Կովկասում առկա ներկայիս լարված իրավիճակը չի խանգարում մարդկանց ակտիվ մուտքերին և ելքերին։ Համաձայն ՀՀ սահմանային մուտքերի և ելքերի գրանցումների` միայն 2023թ-ի հունվար-հուլիս ժամանակահատվածում Հայաստան մուտք է գործել 2,645,161 մարդ, մյուս կողմից ՀՀ-ից դուրս է եկել 2,606,902 մարդ։ Փաստացի մուտքերի և ելքերի տարբերությունը կազմել է 38,259 մարդ։

ՀՀ մշտական բնակչության թիվը նվազել է․ որքա՞ն մարդ է ապրում Երևանում և մարզերում

Նկատենք, որ այս մուտքեր և ելքեր իրականացնողներն ինչպես ՀՀ քաղաքացիներ են, այնպես էլ օտարերկրացիներ: Այս մասով մեր կողմից արված հաշվարկները  տվել են հետևյալ ցուցանիշները․

Հայաստան մուտք և ելք արած քաղաքացիների համապատասխանաբար 40%-ը և 42%-ն  ունեցել են ՀՀ անձնագիր։
ՀՀ անձնագրով մուտք  և ելք արած քաղաքացիների թվաքանակի տարբերությունը կազմել է բացասական մեծություն՝ -38,259 մարդ։

Երկրորդ տեղում են հայտնվել ՌԴ քաղաքացիները։ Այսպես, ՀՀ եկած քաղաքացիների 37%-ը և ելք արած քաղաքացիների 36%-ն ունեցել են ՌԴ անձնագրեր։ Ընդ որում՝ ՌԴ քաղաքացիների մուտքի և ելքի տարբերությունը կազմել է դրական մեծություն՝ 44,396 մարդ։

Հաջորդը Վրաստանի քաղաքացիներն են, որոնց մասնաբաժինը թե՛ մուտքերի, թե՛ ելքերի առումով կազմել է 8%։ Վրաստանի քաղաքացիների մուտքերի և ելքերի տարբերությունը կազմել է 4,956 մարդ։

Վրացիներին հաջորդում են իրանցիները։ Վերջիններիս մասնաբաժինը թե՛ մուտք, թե՛ ելք արած քաղաքացիների ընդհանուր թվաքանակում կազմել է 4%։ Իրանի քաղաքացիների մուտքերի և ելքերի տարբերությունը կազմում է 1,819 մարդ։

ՀՀ մուտք արած քաղաքացիների թվաքանակում 2% մասնաբաժին ունեն ԱՄՆ քաղաքացիները։ Մյուս կողմից ելք արած քաղաքացիների  ընդհանուր թվաքանակում ամերիկացիների մասնաբաժինը կազմել է 1%։ ԱՄՆ քաղաքացիների մուտքերի և ելքերի տարբերությունը կազմում է 6,734 մարդ։