ԱՄՆ-ն երկարաձգել է «Լուկօյլի» արտասահմանյան ակտիվների վաճառքի լիցենզիան

ԱՄՆ ֆինանսների նախարարության արտասահմանյան ակտիվների վերահսկողության գրասենյակը (OFAC) նոր լիցենզիա է տրամադրել, որը թույլատրում է «Լուկօյլի» միջազգային ակտիվների վաճառքի հետ կապված գործարքները մինչև փետրվարի 28-ը։ Համապատասխան փաստաթուղթը հրապարակվել է ԱՄՆ գործակալության կայքում։

Փաստաթուղթը թույլատրում է բանակցություններ և պայմանական պայմանագրեր կնքել ռուսական նավթային ընկերության հետ՝ Lukoil International GmbH (LIG) ընկերության վաճառքի համար, որը տիրապետում է նրա արտասահմանյան ակտիվներին, և ցանկացած այլ ընկերության, որում LIG-ն ուղղակիորեն կամ անուղղակիորեն ունի 50% կամ ավելի բաժնեմաս։ Նախկինում տրված լիցենզիան ուժի մեջ էր մինչև հունվարի 17-ը։

Փաստաթղթում նաև նշվում է, որ «LIG կազմակերպությունների գործունեության, պայմանագրերի կամ այլ պայմանավորվածությունների պահպանման կամ դադարեցման» համար անհրաժեշտ գործարքների թույլտվությունը երկարաձգվել է մինչև հունվարի 17-ը։

«Լուկօյլը» հայտարարել է իր արտասահմանյան ակտիվների վաճառքի մասին այն բանից հետո, երբ ԱՄՆ ֆինանսների նախարարությունը հոկտեմբերի վերջին պատժամիջոցներ կիրառեց նրա և մեկ այլ խոշոր ռուսական նավթային ընկերության՝ «Ռոսնեֆտի» դեմ։

Պատժամիջոցները ներառում են այդ ընկերությունների բոլոր ամերիկյան ակտիվների սառեցում և ամերիկյան կազմակերպություններին արգելում նրանց հետ գործարքներ կնքել։

Գործակալությունը բացատրեց միջոցառումները՝ հղում անելով Ուկրաինայում «խաղաղության գործընթացի նկատմամբ Ռուսաստանի լուրջ հետաքրքրության բացակայությանը»։

«Լուկօյլի» ակտիվների համար հայտ ներկայացրածների թվում էր նաև «Գունվոր» միջազգային էներգետիկ ընկերությունը։

Սակայն «Գունվոր»-ը հետագայում հրաժարվեց գործարքից։ Ակտիվները ձեռք բերելու ցանկություն ունեցողների թվում էին նաև ԱՄՆ-ի «Xtellus Partners» ներդրումային բանկը և «Carlyle»-ը՝ ԱՄՆ-ի խոշորագույն մասնավոր ներդրումային ֆոնդերից մեկը, ինչպես նաև ԱՄՆ-ի «Chevron» էներգետիկ կորպորացիան և «ExxonMobil» նավթային ընկերությունը։