Երևանն ու Վաշինգտոնը հրապարակել են ԹՐԻՓՓ-ի նախագծի վերաբերյալ համատեղ հայտարարությունը։
Հայկական կողմից այն ստորագրել է արտգործնախարար Արարատ Միրզոյանը, ԱՄՆ-ի կողմից՝ պետքարտուղար Մարկո Ռուբիոն։
«Թրամփի ուղի՝ հանուն միջազգային խաղաղության և բարգավաճման» (ԹՐԻՓՓ) նախագծի` Հայաստան-ԱՄՆ իրականացման շրջանակի հրապարակման վերաբերյալ համատեղ հայտարարության տեքստում մասնավորապես նշվում է․
Հայաստանը կառուցապատման իրավունքով 49 տարով Սյունիքում հողատարածք է տրամադրելու հայ-ամերիկյան ընկերությանը։
Տարածքը տրամադրվելու է երկաթգծի և ավտոճանապարհի կառուցման համար, որոնք պետք է ապահովվեն Ադրբեջանի անխոչընդոտ կապը Նախիջևանի հետ։
ԹՐԻՓՓ զարգացման ընկերության 74 տոկոս մասնաբաժինը պատկանելու է ԱՄՆ-ին, 26 տոկոսը՝ Հայաստանին։
Տարանցիկ այդ ճանապարհին գործելու է «ֆրոնտ օֆիս-բեք օֆիս» գործառնական մոդելը, որտեղ ֆրոնտ օֆիսն արտապատվիրակվելու է մասնավոր ընկերությանը, իսկ բեք օֆիսը ՀՀ պետական իրավապահ մարմիններն են։
Հայաստանի տարածքով անցնող օտարերկրյա ավտոմեքենաներևի և բեռների մասին տեղեկատվությունը հավաքելու է մասնավոր ընկերությունը և այն փոխանցելու է հայկական կողմին։
Փաստաթղթում նշվում է, որ ԹՐԻՓՓ-ի միջոցով Հայաստանը ձգտում է.
- ընդլայնել Հայաստանի դերակատարությունը՝ որպես տարածաշրջանային տարանցիկ ու տնտեսական հանգույց,
- ներգրավել օտարերկրյա ներդրումներ Հայաստանի ենթակառուցվածքներում,
- ստեղծել ժամանակակից սահմանային կառավարման և առևտրի դյուրացման ինստիտուցիոնալ կարողություններ,
- ստեղծել կայուն եկամտային հոսքեր և գնման իրավունքներ Հայաստանի համար,
- ամրապնդել ռազմավարական գործընկերությունն ԱՄՆ հետ,
- նպաստել տարածաշրջանային ինտեգրմանն ու կարգավորմանը,
- ընդլայնել Հայաստանի արտահանման ներուժը դեպի նոր շուկաներ։
ԹՐԻՓՓԻ-ի միջոցով ԱՄՆ ակնկալվող օգուտներն են.
- նոր շուկաների բացում ամերիկյան ներդրումների, բիզնեսի ու ապրանքների համար,
- տարածաշրջանում առևտրի համար փոխկապակցվածություն, որը հումք, կարևորագույն հանքանյութեր և հազվագյուտ մետաղներ կբերի ամերիկյան շուկաներ,
- ԱՄՆ, Եվրոպայի և Ասիայի միջև հավելյալ առևտրային ուղիների տարբերակներ՝ ապահովելով, որ մարդիկ և ապրանքները կարողանան տեղաշարժվել՝ անկախ աշխարհաքաղաքական փոփոխություններից։
ԹՐԻՓՓ-ի միջոցով Հայաստանի և Հայաստանի ժողովրդի ակնկալվող օգուտներն են.
- զբաղվածություն. աշխատանքի հնարավորություններ Հայաստանի որակավորված քաղաքացիների համար,
- համատեղ ձեռնարկներ. հնարավորություններ միջազգային և hայաստանյան ընկերությունների միջև,
- տեխնոլոգիայի փոխանցում. կարողությունների զարգացում hայաստանյան ընկերությունների համար,
- վերապատրաստում. հմտությունների զարգացում հայաստանյան աշխատուժի համար,
- վերաներդրում տարածաշրջանում։
Ըստ փաստաթղթի` Հայաստանը հստակորեն պահպանում է նաև
- ԹՐԻՓՓ-ով առևտրի և տարանցման նկատմամբ մաքսային և սահմանային վերահսկողության իրավազորությունը,
- հարկերի, մաքսային տուրքերի և առևտրի ու տարանցման այլ պարտադիր վճարների նկատմամբ իրավազորությունը։
Նիկոլ Փաշինյանը, որ այսօր մասնակցում է «Հայաստանը և խաղաղությունը ռիսկերի և հնարավորությունների խաչմերուկում» քննարկմանը, հղում անելով ստորագրված հայտարարությանը, հայտարարել է․
«Մեր տարածաշրջան ներհոսելու են մեծ ներդրումներ, մեծ փողեր»։
