Strategy ընկերությունը (նախկինում՝ MicroStrategy, բորսայական նշանը՝ MSTR) հայտնել է, որ դեկտեմբերի 29-ից մինչև հունվարի 5-ն ընկած ժամանակահատվածում ձեռք է բերել 1 287 բիթքոյն՝ ընդհանուր առմամբ 116,3 մլն ԱՄՆ դոլարի չափով։
Հունվարի 5-ի դրությամբ Strategy-ի հաշվեկշռում առկա է 673 783 բիթքոյն, ինչը կազմում է բիթքոյնի ընդհանուր էմիսիայի ավելի քան 3%-ը։ 2020 թվականից ի վեր ընկերությունը դրանց ձեռքբերման վրա ծախսել է շուրջ 50,5 մլրդ դոլար՝ մեկ բիթքոյնի միջինում մոտ 75 հազար դոլար գնով։
Գնումը ամբողջությամբ ֆինանսավորվել է MSTR բաժնետոմսերի տեղաբաշխման և վաճառքի միջոցով։ Հունվարի սկզբից ի վեր MSTR-ի բաժնետոմսերի արժեքն աճել է մոտ 3%-ով, մինչդեռ դրանից առաջ հինգ ամիսների ընթացքում դրանց գինը նվազել էր ավելի քան 60%-ով։
Strategy-ի հիմնադիր Մայքլ Սեյլորը հայտնել է նաև, որ ընկերության պահուստներին ավելացվել է ևս 62 մլն դոլար, ինչի արդյունքում դրանց ընդհանուր ծավալը հասել է 2,25 մլրդ դոլարի։
