Եվրոպան փչացնում է Թրամփի հետ կնքված գործարքը

Եվրամիությունը կրճատել է ԱՄՆ-ից նավթի և գազի վրա իր ծախսերը, չնայած ԱՄՆ նախագահ Դոնալդ Թրամփի հետ հարյուր միլիարդավոր դոլարների ամերիկյան էներգիա գնելու վերաբերյալ համաձայնություններին, հաղորդում է Financial Times-ը։

Հրապարակման համաձայն, ԵՄ-ն վերջին չորս ամիսների ընթացքում 7%-ով կրճատել է ԱՄՆ-ից էներգիայի վրա իր ծախսերը, չնայած նախկինում հայտարարված ծրագրերին՝ երեք տարվա ընթացքում 750 միլիարդ դոլարի ամերիկյան նավթ և գազ գնելու։

FT-ն, հղում անելով Kpler խորհրդատվական ընկերության հաշվարկներին, նշում է, որ 2025 թվականին ԵՄ երկրները ԱՄՆ-ից կներմուծեն 29,6 միլիարդ դոլարի նավթ և հեղուկացված բնական գազ (LNG): Վաշինգտոնի հետ ձեռք բերված համաձայնություններին չնայած, նավթի և գազի համաշխարհային գների անկումը հանգեցրել է ԱՄՆ-ից ներմուծման արժեքի նվազման՝ նախորդ տարվա համեմատ։

Kpler-ի ավագ գիտաշխատող Ջիլիան Բոկարան նշում է, որ էներգիայի գնման որոշումները հիմնված են տնտեսական նպատակահարմարության, այլ ոչ թե քաղաքական համաձայնությունների վրա։ Նրա խոսքով, համաձայնագիրը հիմնականում նախատեսված է ԱՄՆ սակագների հետ կապված ռիսկերը նվազեցնելու համար, բայց իր սկզբնական տեսքով այն չի գործի։

ԱՄՆ նախագահ Դոնալդ Թրամփի և Եվրահանձնաժողովի նախագահ Ուրսուլա ֆոն դեր Լեյենի կողմից այս ամռանը ստորագրված սակագնային համաձայնագրի պայմանների համաձայն՝ ԵՄ-ն համաձայնվեց ԱՄՆ-ի կողմից եվրոպական բոլոր ներմուծումների վրա միակողմանի 15% սակագներ սահմանելուն և ստանձնեց մի շարք ֆինանսական պարտավորություններ, այդ թվում՝ երեք տարվա ընթացքում ամերիկյան էներգիայի 750 միլիարդ դոլարի գնումը։

Եվրոպացի փորձագետները նշում են, որ այս պայմանները բավարարելու համար ԵՄ-ն պետք է իր էներգակիրների ներմուծման կառուցվածքում ԱՄՆ մատակարարումների բաժինը մեծացնի մինչև իր ընդհանուր գնումների մոտավորապես երկու երրորդը։