Եվրոպական խորհրդարանը հաստատել է ռուսական գազի ներմուծումը մինչև 2027 թվականի վերջը փուլ առ փուլ դադարեցնելու ծրագիրը։ Նախաձեռնության օգտին քվեարկել է 500 անդամ, դեմ՝ 120։ Եվս 32 պատգամավոր ձեռնպահ է մնացել։
ԵՄ դեսպանները դեկտեմբերի 10-ին հաստատել են ծրագիրը։
Այժմ, Եվրախորհրդարանի որոշումից հետո, օրենքը կներկայացվի ԵՄ նախարարների քվեարկությանը։
Այն կարող է ընդունվել մեծամասնության ձայներով, չնայած Հունգարիայի և Սլովակիայի դեմ արտահայտվելուն։
ԵՄ-ն, ինչպես սպասվում է, փուլ առ փուլ կդադարեցնի հեղուկ բնական գազի ներմուծումը 2026 թվականի վերջից, իսկ խողովակաշարային գազի ներմուծումը՝ 2027 թվականի աշնանը։
Ծրագիրը թույլ է տալիս գնումներ կատարել որոշակի պայմաններով՝ կարճաժամկետ պայմանագրերով (չորս շաբաթ՝ երկարաձգման հնարավորությամբ) և միայն «ճգնաժամային կառավարման համար»՝ արտակարգ իրավիճակի դեպքում։
Հունգարիայի արտաքին գործերի նախարար Պետեր Սիյարտոն հայտարարել է, որ երկրի իշխանությունները, ինչպես իրենց սլովակ գործընկերները, պատրաստվում են դատական հայց ներկայացնել Եվրոպական դատարան՝ պահանջելով չեղարկել ԵՄ-ի՝ ռուսական էներգակիրներից լիովին հրաժարվելու ծրագիրը։
Նա նշել է, որ նման որոշումը պահանջում է միաձայն հաստատում։ Երկու երկրներն էլ նավթ և գազ են ստանում Ռուսաստանից «Դրուժբա» և «Թուրքական հոսք» խողովակաշարերի միջոցով։
Բաժանորդագրվեք մեր ալիքին Telegram-ում
