ՀՀ հակակոռուպցիոն կոմիտեում քննված քրեական վարույթով իրականացված նախաքննությամբ պարզվել է, որ ՀՀ կադաստրի կոմիտեում տարբեր պաշտոններ զբաղեցրած Գ. Մ.-ն, մի շարք անձանց օժանդակությամբ, 2021 թվականի ընթացքում խարդախությամբ հափշտակել է առանձնապես խոշոր չափերի՝ 58.990.317 ՀՀ դրամ շուկայականին մոտարկված կադաստրային արժեքով, Երևան քաղաքի կենտրոնական հատվածում գտնվող 256,3 քմ մակերեսով ոչ բնակելի անշարժ գույքը, իսկ Գ․ Մ․-ին օժանդակած անձինք, նպատակ ունենալով քողարկել հիշյալ գույքի հանցավոր ծագումն ու պատկանելությունը, ձևական գործարքների միջոցով այն գրանցել են տարբեր անձանց անուններով և օրինականացրել: Այս մասին հայտնում են Հակակոռուպցիոն կոմիտեից։
Բացի այդ, նախաքննությամբ պարզվել է որ Գ. Մ.-ն, Հ. Ա.-ի հետ նախնական համաձայնությամբ, հափշտակել է Երևան քաղաքի մեկ այլ հասցեում գտնվող, առանձնապես խոշոր չափերի՝ 51.886.590 ՀՀ դրամ շուկայականին մոտարկված կադաստրային արժեքով համայնքային սեփականություն հանդիսացող հողամասը: Մասնավորապես՝ հիշյալ հողամասի վերաբերյալ կազմվել է կեղծ կադաստրային գործ, որում, ի թիվս այլնի, դրվել են հողամասի առուվաճառքի կեղծ պայմանագիր և Հ. Ա.-ի հետ փոխկապակցված անձի անվամբ սեփականության իրավունքի կեղծ վկայական: Արդյունքում՝ Գ. Մ.-ն և Հ. Ա.-ն ձեռք են բերել կեղծ փաստաթղթերի օգտագործմամբ հափշտակված վերը նշված հողամասը փաստացի տնօրինելու և օգտագործելու հնարավորություն:
Բաժանորդագրվեք մեր ալիքին Telegram-ում
