ԵՄ-ն կասեցրել է Վրաստանի մասնակցությունը անվտանգության և հանցավորության դեմ պայքարի ծրագրերին

Եվրամիությունը դադարեցրել է Վրաստանի մասնակցությունը ԵՄ-ի կողմից ֆինանսավորվող անվտանգության և կազմակերպված հանցավորության դեմ պայքարի տարածաշրջանային նախագծերին։ Այդ մասին ասվում է Վրաստանում ԵՄ դեսպան Պավել Հերչինսկու՝ երկրի արտաքին գործերի նախարարությանը հասցեագրված նամակում, հայտնում է «Ռուսթավի 2»-ը։

«Վրաստանում տեղի ունեցած բացառիկ հանգամանքների և 2024 թվականի հունիսի 27-ին Եվրոպական խորհրդի եզրակացության համաձայն՝ որի արդյունքը Վրաստանի ԵՄ անդամակցության գործընթացի դե ֆակտո կասեցումն էր, տեղեկացնում եմ, որ Վրաստանի մասնակցությունը ԵՄ-ի կողմից ֆինանսավորվող անվտանգության և կազմակերպված հանցավորության դեմ տարածաշրջանային նախագծերին կասեցվել է», — նշված է նամակում, որը հասցեագրված է Վրաստանի արտաքին գործերի նախարարի առաջին տեղակալ Գիորգի Զուրաբիշվիլուն։

Հերչինսկին նաև հստակեցրել է, որ խոսքը վերաբերում է երեք նախագծի՝

• Եվրոպոլի աջակցությամբ Արևելյան գործընկերության շրջանակում կազմակերպված հանցավորության դեմ պայքարի ծրագրին,

• կազմակերպված հանցավորության դեմ պայքարում համագործակցության (TOPCOP II) նախագծին,

• և ԵՄ-ում թմրանյութերի մոնիթորինգի ծրագրին (EU4MD II)։

Այս ծրագրերից Վրաստանի հեռացումը ուժի մեջ է մտել հոկտեմբերի 15-ից և վերաբերում է Վրաստանի ՆԳՆ և արդարադատության նախարարության ներկայացուցիչներին։