Հիմա էլ ղազախական ցորենն է Ադրբեջանով «ճանապարհ ընկել» դեպի Հայաստան

Ղազախական ծագման ցորենով բեռնված վագոնները դուրս են եկել Ադրբեջանի Բալաջարի երկաթուղային կայարանից և Վրաստանի տարածքով կուղևորվեն Հայաստան։ 

«Արմենպրես»-ի փոխանցմամբ՝ այս մասին հայտնել է ադրբեջանական APA գործակալությունը։

Նշվում է, որ Ղազախստանից Հայաստանի համար նախատեսված շուրջ 1000 տոննա ցորենով բեռնված 15 վագոններն Ադրբեջան էին հասել նոյեմբերի 5-ին։

Ավելի վաղ Ադրբեջանի նախագահ Իլհամ Ալիևը հայտարարել էր, որ Ադրբեջանը հանել է իր տարածքով դեպի Հայաստան բեռների տարանցման բոլոր սահմանափակումները՝ հայտնելով, որ Ղազախստանից Ադրբեջանի տարածքով ցորենի առաջին խմբաքանակը կուղարկվի Հայաստան։ Ալիևի այս հայտարարությունը ողջունել էր ՀՀ վարչապետ Նիկոլ Փաշինյանը՝ իր հերթին հայտնելով, որ Հայաստանն էլ իր հերթին հանում է բոլոր սահմանափակումները իր տարածքով դեպի Ադրբեջան և Թուրքիա բեռնարի տարանցման համար։

Նոյեմբերի 6-ի գիշերը Հայաստան էր հասել շուրջ 1000 տոննա ցորենի խմբաքանակը, որն Ադրբեջանի տարածքով ուղարկվել էր Ռուսաստանի կողմից։  Ռուսաստանն արդեն իսկ հայտարարել է, որ առաջիկայում ևս 132 վագոն ցորենի խմբաքանակ կարտահանի Հայաստան՝ Ադրբեջանի տարածքով։