Եվրոպայի ռազմական ծախսերը կտրուկ կաճեն

Եվրամիության (ԵՄ) երկրների ընդհանուր ծախսերը ռազմական շարժունակության վրա 2028–2034 թվականներին կաճեն 10 անգամ՝ հասնելով 17 միլիարդ եվրոյի։ Այս մասին, ինչպես հայտնում է ՏԱՍՍ-ը, հայտարարել է կայուն տրանսպորտի և տուրիզմի հարցերով եվրահանձնակատար Ապոստոլոս Ցիցիկոստասը։

Նրա խոսքով՝ այս քայլը ուղղված է հնարավոր տարածաշրջանային պատերազմի դեպքում զինվորների պատրաստվածությունը բարձրացնելուն, մասնավորապես՝ Ռուսաստանի սպառնալիքի ֆոնին։

«ԵՄ-ի նոր յոթամյա բյուջետային պլանում ռազմական շարժունակության ոլորտի նախագծերի բյուջեն կաճի 10 անգամ», — նշել է Ցիցիկոստասը։

Նշված նպատակների համար նախատեսված 2021–2027 թվականների միջոցները, ըստ եվրահանձնակատարի, ծախսվել են ընդամենը երեք տարում՝ անդամ-երկրների մեծ հետաքրքրության պատճառով։ Ծրագրերը ներառում են ամբողջ տարածաշրջանի տրանսպորտային ենթակառուցվածքների՝ նավահանգիստների, օդանավակայանների, երկաթուղիների, ավտոմայրուղիների, կամուրջների և թունելների վերակառուցում՝ զորքերի արագ տեղափոխման համար։

ՆԱՏՕ-ն հիմնական ուղղությամբ դիտարկում է արևմուտքից դեպի արևելք՝ Ռուսաստանի և Բելառուսի սահմանների կողմ։ Ատլանտյան ափամերձ նավահանգիստներ ժամանող ԱՄՆ-ի, Մեծ Բրիտանիայի և Կանադայի ուժերը, հնարավոր լայնածավալ պատերազմի դեպքում, պետք է տեղաբաշխվեն Կենտրոնական և Արևելյան Եվրոպայի երկրներում։

2025 թվականի արդյունքներով ՆԱՏՕ-ի ընդհանուր ռազմական ծախսերը, ըստ կանխատեսումների, կաճեն 15,9 տոկոսով։ Վերջին երեք տարում ՆԱՏՕ-ի, ԵՄ-ի և Կանադայի նմանատիպ ծախսերը աճել են 46 տոկոսով՝ հասնելով 550 միլիարդ ԱՄՆ դոլարի։