Tether-ը, TRON-ը և TRM Labs-ը սառեցրել են ավելի քան 300 մլն դոլար արժողությամբ USDT՝ կապված անօրինական գործունեության հետ

Աշխարհի ամենամեծ ստեյբլքոինի՝ USDT-ի թողարկողը՝ Tether ընկերությունը, համագործակցելով TRON բլոկչեյնի թիմի և TRM Labs վերլուծական ընկերության հետ, սառեցրել է ավելի քան 300 միլիոն դոլար արժողությամբ USDT, որոնք կապված էին տարբեր օրենքով արգելված գործունեության դեպքերի հետ։ Այս ցուցանիշը ներկայացվել է 2024 թվականի սեպտեմբերից, երբ գործարկվել է նոր ստորաբաժանումը։

Շատ կենտրոնացված ստեյբլքոիններ, այդ թվում՝ USDT-ն, ունեն գործառույթներ, որոնք թույլ են տալիս արգելափակել ակտիվները կոնկրետ դրամապանակներում՝ բլոկչեյնի մակարդակում,՝ դրանց կցելով համապատասխան նշագրումներ վերլուծական համակարգերում։

Այս նախաձեռնությունը՝ T3 Financial Crime Unit (T3 FCU) անվամբ, ըստ Tether-ի, դարձել է բլոկչեյն անվտանգության ոլորտում պետական և մասնավոր հատվածների համագործակցության օրինակ։
Կազմակերպությունը ուղղակի համագործակցում է իրավապահ մարմինների հետ ամբողջ աշխարհում, որպեսզի հայտնաբերի, հետաքննի և կանխի կրիպտոարժույթներով զբաղվող հանցավոր ցանցերի գործունեությունը։

Ամենամեծ սառեցումները գրանցվել են ԱՄՆ-ում՝ 83 միլիոն դոլարի չափով (37 գործ)։ Բացի ԱՄՆ-ից, միջոցներ են սառեցվել նաև Իսպանիայում, Գերմանիայում, Ալբանիայում, Բուլղարիայում, Ֆինլանդիայում, Բրազիլիայում (ավելի քան 13 մլն դոլար, 7 գործ), Ավստրալիայում, Լեհաստանում և Մեծ Բրիտանիայում։

Հետաքննությունների հիմնական ուղղությունները ներառում են՝

• անօրինական ապրանքներ և ծառայություններ (39%),

• խարդախություններ և ֆինանսական ապօրինություններ,

• հաքերային հարձակումներ,

• գործեր, կապված ԿԺԴՀ-ի հետ (օր.՝ Bybit-ի հաքերումը),

• արգելված նյութեր և

• ահաբեկչության ֆինանսավորում։

Բացի այդ, ստորաբաժանումը նշել է, որ աճել է ֆիզիկական բռնության դեպքերի քանակը, որոնք ուղղված են կրիպտոակտիվների տերերի դեմ՝ նրանց դրամապանակների հասանելիության նպատակով։