Շվեյցարական ժամացույցների արտահանումը սեպտեմբերին կտրուկ նվազել է՝ ԱՄՆ-ի կողմից Շվեյցարիայից ներկրվող արտադրանքի վրա 39% ներմուծման մաքսատուրք սահմանելու պատճառով, գրում է Bloomberg-ը։
Ամերիկյան շուկա մատակարարումները նվազել են 55%-ով, ինչը երկրորդ անընդմեջ ամիսն է անկման։ Հուլիսին շվեյցարական արտադրողները կտրուկ ավելացրել էին արտահանումը՝ փորձելով հասցնել մաքսատուրքերի ուժի մեջ մտնելուց առաջ։
Ամերիկյան բարձր մաքսատուրքերի ազդեցության տակ են հայտնվել խոշոր արտադրողներ՝ Richemont, Swatch Group AG, ինչպես նաև անկախ բրենդներ՝ Audemars Piguet, Patek Philippe և Rolex SA։
Առանց ԱՄՆ շուկայի՝ շվեյցարական ժամացույցների արտահանումը սեպտեմբերին աճել է 7,8%-ով, սակայն ԱՄՆ-ը ներառելով՝ համաշխարհային արտահանումը նվազել է 3,1%-ով՝ հասնելով 2 մլրդ շվեյցարական ֆրանկի (մոտ $2,5 մլրդ)։
Ամենամեծ անկումը նկատվել է պողպատյա մոդելների արտահանման մեջ, մինչդեռ միջին գնային սեգմենտի ժամացույցների արտահանումը աճել է 4,2%-ով։ Ընդհանուր շվեյցարական արտահանումը դեպի ԱՄՆ, այնուամենայնիվ, սկսել է վերականգնվել՝ վկայելով ամերիկյան կայուն պահանջարկի մասին։
Շվեյցարիայի կառավարությունը շարունակում է բանակցությունները Վաշինգտոնի հետ՝ մաքսատուրքերի նվազեցման ուղղությամբ, սակայն, ըստ աղբյուրի, զգալի առաջընթաց դեռ չի գրանցվել։
Բաժանորդագրվեք մեր ալիքին Telegram-ում
