Ոսկու և արծաթի գները ժամերով են աճում

Ոսկու և արծաթի գները շարունակում են հասնել բոլոր ժամանակների նոր բարձրակետերի։ Հոկտեմբերի 14-ին, երեքշաբթի օրը, Comex-ում ոսկու դեկտեմբերյան ֆյուչերսները աճել են 1.2%-ով՝ պատմության մեջ առաջին անգամ հասնելով 4,182.4 դոլարի մեկ ունցիայի համար, Երևանի ժամանակով ժամը 8:14-ի դրությամբ առևտրային տվյալների։

Comex-ում դեկտեմբեր ամսվա արծաթի ֆյուչերսները աճել են 3.91%-ով՝ հասնելով 52.4 դոլարի մեկ ունցիայի համար, ըստ առևտրային տվյալների։ Արծաթի մեկ ունցիայի գինը նույնպես պատմության մեջ առաջին անգամ բարձրացել է 52 դոլարից մեկ ունցիայի համար։

Թանկարժեք մետաղները բարձրացել են նոր ռեկորդային բարձրակետերի, այն բանից հետո, երբ ԱՄՆ նախագահ Դոնալդ Թրամփը հայտարարեց Չինաստանից ներմուծման վրա 100% մաքսատուրքերի սահմանման մասին, որոնք ուժի մեջ են մտնում նոյեմբերի 1-ից՝ ի լրումն ներկայումս գործողների։

Տարվա սկզբից ի վեր ոսկու ֆյուչերսները աճել են ավելի քան 55%-ով, մինչդեռ արծաթը՝ ավելի քան 70%-ով։ Քաղաքական և տնտեսական անկայունության պայմաններում ոսկին դառնում է ներդրողների համար անվտանգ ապաստան։ Ոսկու գների աճը պայմանավորված էր կենտրոնական բանկերի գնումներով, բորսայական ֆոնդերում պահումների ավելացմամբ և Դաշնային պահուստային համակարգի ցածր տոկոսադրույքներով։ Անվտանգ ապաստարանների պահանջարկը խթանվել է նաև ԱՄՆ-ի և Չինաստանի միջև առևտրային լարվածությամբ, Դաշնային պահուստային համակարգի անկախության կորստի սպառնալիքներով և ԱՄՆ կառավարության փակմամբ։

Bank of America-ն կանխատեսում է երկու մետաղների գների հետագա աճ հաջորդ տարի։ Վերլուծաբանները բարձրացրել են ոսկու գնի իրենց կանխատեսումը մինչև 5000 դոլար մեկ ունցիայի համար 2026 թվականի համար։ Հաջորդ տարվա միջին գնի կանխատեսումը կազմում է 4400 դոլար մեկ ունցիայի համար։ Վերլուծաբանների սպասումները արծաթի համար համապատասխանաբար կազմում են 65 դոլար և 56.25 դոլար մեկ ունցիայի համար։