Իսպանական «Էնագաս» գազային ընկերությունը պատրաստ է դադարեցնել ռուսական հեղուկ բնական գազի (ՀԲԳ) օգտագործումը մինչև 2027 թվականը: Ծավալները կփոխարինվեն ԱՄՆ-ից եկող գազով: Այս մասին հայտարարել է ընկերության գործադիր տնօրեն Արթուրո Գոնսալոն Reuters-ին տված հարցազրույցում:
Եվրամիությունը քննարկում է ռուսական նավթի և գազի ներմուծումը մինչև 2028 թվականի հունվարը աստիճանաբար դադարեցնելու ծրագիրը, ինչպես նաև ռուսական ՀԲԳ-ի հնարավոր արգելքը 2027 թվականից: Այս միջոցառումները նպատակ ունեն նվազեցնել Կրեմլի եկամուտները, որոնք օգտագործվում են Ուկրաինայի դեմ պատերազմը ֆինանսավորելու համար:
Գոնսալոյի խոսքով՝ «Էնագասի» ենթակառուցվածքները թույլ են տալիս ռուսական գազից անցում կատարել արդեն 2027 թվականից:
«Ես հասկանում եմ, որ Եվրոպան պետք է բարձրացնի Ռուսաստանի դեմ պատժամիջոցների հավակնությունների մակարդակը», — ասել է նա:
Ընկերության գործադիր տնօրենը ընդգծել է, որ Իսպանիան «տեխնիկապես պատրաստ է գործել առանց ռուսական գազի»: Նա նշել է, որ գազի օպերատորներն արդեն օգտագործում են հավաստագրման համակարգ՝ ՀԲԳ մատակարարումների ծագումը հետևելու համար:
«Էնագասը» պահանջում է, որ հեղուկացված բնական գազի փոխադրման ընկերությունները նշեն Իսպանիայում բեռնաթափված բեռների ծագումը։ Այս տեղեկատվությունը ստուգվում է ուղեկցող փաստաթղթերի հետ և ենթարկվում է մաքսային ստուգումների։
ԵՄ փաստաթղթի նախագծի համաձայն՝ ներմուծողները պարտավոր կլինեն ներկայացնել գազի ծագման երկրի ապացույց, նախքան այն Եվրոպա ժամանելը։ Ազգային իշխանությունները կկարողանան լրացուցիչ տեղեկատվություն պահանջել մատակարարման պայմանագրերի վերաբերյալ։
Բաժանորդագրվեք մեր ալիքին Telegram-ում
