Եվրոպան մերժում է ԱՄՆ պատժամիջոցները Չինաստանի դեմ

ԱՄՆ վարչակազմը պատրաստ է նոր սակագներ սահմանել Չինաստանի նկատմամբ ռուսական նավթի գնման համար, եթե ստանա եվրոպացի դաշնակիցների աջակցությունը: Սակայն, Եվրախորհրդարանը չի մտադիր հաստատել նման միջոցառումներ, հայտարարել է ԱՄՆ ֆինանսների նախարար Սքոթ Բեսենթը Վաշինգտոնում կայացած մամուլի ասուլիսում:

ԱՄՆ ֆինանսների նախարարը նշել է, որ ԱՄՆ նախագահ Դոնալդ Թրամփը հանձնարարել է իրեն «ասել մեր եվրոպացի դաշնակիցներին, որ մենք կաջակցենք այն բանին, ինչը կարելի է անվանել Չինաստանի նկատմամբ սակագներ ռուսական նավթի [գնումների] համար, կամ Չինաստանի նկատմամբ սակագներ Ուկրաինայի հաղթանակի համար, բայց մեր եվրոպացի դաշնակիցները պետք է պատրաստ լինեն հետևել մեզ»:

Բեսենթը վստահեցրել է, որ 85 սենատորներ ներկայումս պատրաստ են աջակցել չինական ներմուծման վրա 500% սակագներ սահմանելու օրինագծին՝ ռուսական նավթի գնման պատրվակով: Սակայն նա նշել է, որ «մեզ ասել են, որ Եվրախորհրդարանը չի հաստատի նույն միջոցառումները»:

Նախարարը նաև հայտարարել է, որ «Չինաստանը գնում է ռուսական էներգիայի 60%-ը»:

Սեպտեմբերի 20-ին Թրամփը հաստատել է, որ ՆԱՏՕ-ում ԱՄՆ մշտական ​​ներկայացուցիչ Մեթյու Ուիթաքերը մտադիր է ճնշում գործադրել եվրոպացի դաշնակիցների վրա՝ ռուսական նավթի գնումները դադարեցնելու համար:

Սեպտեմբերի 13-ին Թրամփը հայտարարեց Մոսկվայի դեմ կոշտ պատժամիջոցներ կիրառելու իր պատրաստակամության մասին՝ պայմանով, որ ՆԱՏՕ-ի բոլոր անդամները միավորվեն և դադարեցնեն Ռուսաստանից էներգակիրների ներմուծումը՝ ընդգծելով, որ որոշ դաշնակիցների կողմից շարունակական ներմուծումը «թուլացրել է դաշինքի բանակցային դիրքերը»։