Եվրոպական խորհրդարանը ցանկանում է ավելի արագ դադարեցնել ռուսական էներգակիրների ներմուծումը

Եվրոպական խորհրդարանը քննարկում է ռուսական էներգակիրների ներմուծման փուլային դադարեցման արագացման հարցը։ Bloomberg-ը՝ հղում անելով աղբյուրներին, հաղորդում է, որ նավթի մատակարարումները նախատեսվում է արգելել 2026 թվականից սկսած, իսկ գազի մատակարարումները՝ 2027 թվականից։

Եվրոպական խորհրդարանի համապատասխան հանձնաժողովը նախատեսում է հոկտեմբերի 16-ին քվեարկել RePowerEU ծրագրի փոփոխությունների վերաբերյալ՝ ռուսական էներգակիրների ներմուծումը կրճատելու համար։ Միջոցառումների ընդունման համար անհրաժեշտ է ԵՄ Խորհրդում և Եվրախորհրդարանում ձայների մեծամասնությունը։

RePowerEU-ն սկզբում առաջարկել էր փուլ առ փուլ դադարեցնել ռուսական նավթի և գազի արտահանումը մինչև 2027 թվականի վերջը։ Ծրագիրը նաև ներառում է Ռուսաստանի «ստվերային նավատորմի» դեմ պայքարի միջոցառումներ, որը ԵՄ-ն անվանում է այն նավերը, որոնք Ռուսաստանը, ենթադրաբար, օգտագործում է պատժամիջոցներից խուսափելու համար։

Bloomberg-ի տվյալներով՝ Եվրոպական հանձնաժողովը նաև նախատեսում է տուրքեր սահմանել «Դրուժբա» խողովակաշարով Հունգարիա և Սլովակիա ներմուծվող ռուսական նավթի վրա։ Դրա համար անհրաժեշտ է ԵՄ բոլոր երկրների համաձայնությունը։

«Թուրքական հոսքը» մնում է ռուսական խողովակաշարային գազի Եվրոպա մատակարարման միակ երթուղին։ ԵՄ-ին հեղուկացված բնական գազի մատակարարների շարքում Ռուսաստանը երկրորդն է՝ 15% մասնաբաժնով, միայն Միացյալ Նահանգներից հետո։