Երբ ակտիվները սառեցվում են, պետք է հարգվի միջազգային իրավունքը․ Մակրոնը քննադատել է Գերմանիայի կանցլերին

Ֆրանսիայի նախագահ Էմանուել Մակրոնը քննադատել է Գերմանիայի կանցլեր Ֆրիդրիխ Մերցի առաջարկը՝ Ուկրաինային տրամադրել մոտ 140 միլիարդ եվրոյի անտոկոս վարկ՝ օգտագործելով ԵՄ-ում սառեցված ռուսական սուվերեն ակտիվները, հաղորդում է The Guardian-ը։

«Երբ ակտիվները սառեցվում են, պետք է հարգվի միջազգային իրավունքը», — լրագրողներին ասել է Ֆրանսիայի առաջնորդը Կոպենհագենում կայացած ԵՄ ոչ պաշտոնական գագաթնաժողովի շրջանակներում։

Սեպտեմբերի 10-ին Եվրահանձնաժողովի նախագահ Ուրսուլա ֆոն դեր Լեյենը հայտարարել է, որ Եվրահանձնաժողովը չի պլանավորում բռնագրավել Արևմուտքում սառեցված ռուսական ակտիվները, այլ մտադիր է դրանք օգտագործել Ուկրաինային վարկեր տրամադրելու համար։

Եվրոպայում սառեցված ավելի քան 200 միլիարդ եվրոյի ռուսական սուվերեն ակտիվների մեծ մասը պահվում է Բելգիայի Euroclear պահոցում։ Euroclear-ն ինքը բազմիցս դեմ է եղել դրանց բռնագրավմանը՝ զգուշացնելով, որ նման գործողությունները կարող են հանգեցնել Ռուսաստանի կողմից դատական ​​​​հայցի՝ պահանջելով արտասահմանում գտնվող եվրոպական կամ բելգիական ակտիվների բռնագրավում։

Ավելի վաղ Գերմանիայի կանցլեր Ֆրիդրիխ Մերցը բրիտանական Financial Times-ի համար հոդվածում նշել է, որ Բեռլինը աջակցում է Ուկրաինային վարկ տրամադրելու գաղափարին՝ օգտագործելով ռուսական ակտիվները։