Ուկրաինան երկու միլիարդ եվրո կհատկացնի անօդաչու թռչող սարքերի արտադրության համար

Եվրահանձնաժողովը համաձայնության է եկել Ուկրաինայի հետ անօդաչու թռչող սարքերի արտադրության համար 2 միլիարդ եվրո հատկացնելու հարցում, հայտարարել է Եվրոպական հանձնաժողովի նախագահ Ուրսուլա ֆոն դեր Լեյենը Բրյուսելում Անվտանգության խորհրդի նիստի մեկնարկից առաջ։

«Եթե մենք շարունակենք հավատալ, որ Ուկրաինան մեր պաշտպանության առաջին գիծն է, մենք պետք է ուժեղացնենք Ուկրաինային տրամադրվող ռազմական օգնությունը։ Հետևաբար, մենք հատուկ համաձայնության ենք եկել Ուկրաինայի հետ 2 միլիարդ եվրո ծախսել անօդաչու թռչող սարքերի վրա», — հայտարարել է ֆոն դեր Լեյենը։

Նրա խոսքով՝ ֆինանսավորումը պետք է օգնի Ուկրաինային ամրապնդել իր սեփական պաշտպանական կարողությունները՝ միաժամանակ զարգացնելով Եվրամիության համար օգտակար բարձր տեխնոլոգիական ակտիվներ։ «Սա թույլ է տալիս Ուկրաինային ընդլայնվել և օգտագործել իր ողջ ներուժը։ Եվ, իհարկե, դա նաև թույլ կտա ԵՄ-ին օգտվել այս տեխնոլոգիայից», — հավելել է նա։

Ըստ Ուկրաինայի պաշտպանության նախարար Դենիս Շմիգալի՝ պատերազմի սկզբից ի վեր Ուկրաինայի զենքի արտադրությունը 35 անգամ աճել է։ Ուկրաինան նախատեսում է ավելացնել այս ցուցանիշը։ Այս տարվա հուլիսին Ուկրաինան և ամերիկյան Swift Beat ընկերությունը հուշագիր են ստորագրել անօդաչու թռչող սարքերի արտադրությունը ընդլայնելու վերաբերյալ։ Այս համաձայնագրի համաձայն՝ Ուկրաինայի զինված ուժերը կստանան հրթիռներ ոչնչացնելու համար անհրաժեշտ անօդաչու թռչող սարքեր։