Գերմանական ավտոմոբիլային հսկա Volkswagen-ը հոկտեմբերից սկսած կրճատելու է արտադրությունը Գերմանիայի մի շարք գործարաններում՝ էլեկտրոմեքենաների վաճառքի նվազման պատճառով, հայտնում է DPA գործակալությունը՝ վկայակոչելով ընկերության ներկայացուցչին։
Ըստ հաղորդագրության՝ հոկտեմբերի 6-ից մեկ շաբաթով կդադարեցվի արտադրությունը Ցվիկկաուի և Դրեզդենի գործարաններում։ Էմդենում ևս քննարկվում են արտադրական դադարներ, որոնց վերաբերյալ որոշումը կընդունվի առաջիկա շաբաթվա ընթացքում։
Volkswagen-ի ներկայացուցիչը նշել է, որ հիմնական պատճառը Ցվիկկաուի և Էմդենի գործարաններում արտադրվող էլեկտրոմեքենաների ցածր պահանջարկն է։ Բացի այդ, արդեն որոշվել է արտադրության կրճատում նաև Օսնաբրյուքի գործարանում․ մինչև տարվա վերջ այնտեղ շաբաթական առնվազն մեկ ոչ աշխատանքային օր կլինի, ինչպես նաև հոկտեմբերին՝ մեկ լրացուցիչ դադար։
Volkswagen-ը, որի կենտրոնական գրասենյակը գտնվում է Վոլֆսբուրգում, աշխարհի և Եվրոպայի առաջատար ավտոարտադրողներից է։ Ընկերությունը ունի 115 գործարան՝ 17 եվրոպական և ևս 10 այլ երկրների տարածքում։ 2025 թվականի հունիսի վերջի տվյալներով ընկերությունում աշխատում է մոտ 667,19 հազար աշխատակից։
Ավելի վաղ ընկերությունը քննարկել էր արտադրության և աշխատակիցների կրճատման ծրագրեր, որոնք առաջացրել էին աշխատակիցների դժգոհությունը և ստիպել ղեկավարությանը պայմանավորվել արհմիությունների հետ՝ չիրականացնել հարկադրական կրճատումներ և չփակել գործարաններ։ Այնուամենայնիվ, Volkswagen-ը դեռ նպատակ ունի մինչև 2030 թվականը կրճատել շուրջ 35 հազար աշխատատեղ։
Ֆինանսական դժվարությունների մասին վերջերս հայտնել են նաև Գերմանիայի այլ ավտոարտադրողներ։
Բաժանորդագրվեք մեր ալիքին Telegram-ում
