Ռուսաստանի ֆինանսների նախարարությունը առաջարկել է 2026 թվականից սկսած ԱԱՀ-ն 20%-ից բարձրացնել մինչև 22%՝ Ուկրաինայի հետ շարունակվող պատերազմի ընթացքում ռազմական ծախսերը ֆինանսավորելու համար։ Այս մասին ասվում է նախարարության հայտարարության մեջ։
Նշվում է, որ հարկերի բարձրացումը «հիմնականում ուղղված կլինի պաշտպանության և անվտանգության ֆինանսավորմանը»։ Ավելին, առաջարկվում են լրացուցիչ միջոցառումներ, այդ թվում՝ խաղային արդյունաբերության հարկերի բարձրացում։
«Ռազմավարական առաջնահերթությունը երկրի պաշտպանության և անվտանգության կարիքների ֆինանսական աջակցությունն ու «հատուկ ռազմական գործողության» մասնակիցների ընտանիքների սոցիալական աջակցությունն է», — ասվում է հայտարարության մեջ։
Նախարարությունը շեշտել է, որ բյուջետային միջոցները թույլ կտան զենք և սարքավորումներ մատակարարել բանակին, մինչդեռ լրացուցիչ եկամուտները կօգտագործվեն զինծառայողներին վճարումներ կատարելու, նրանց ընտանիքներին աջակցելու և պաշտպանական արդյունաբերության արդիականացման համար։ Երկրում հարկային բեռի աճը ուղղակիորեն կապված է պատերազմի շարունակության հետ. հիմնական ռեսուրսները կկենտրոնացվեն բանակի և ռազմաարդյունաբերական համալիրի կարիքների վրա։
Անցյալ շաբաթ Ռուսաստանի նախագահ Վլադիմիր Պուտինը հայտարարեց որոշակի հարկեր բարձրացնելու իր պատրաստակամության մասին՝ ռազմական ծախսերը ծածկելու համար։
Բաժանորդագրվեք մեր ալիքին Telegram-ում
