Հայաստանի Հանրապետության անկախության օրը՝ սեպտեմբերի 21-ին` ժամը 12:00- ին, Առնո Բաբաջանյան համերգասրահի ճեմասրահում կայացավ «ԿԱՄՔ․ Վ. Սարգսյան» գրական երրորդ մրցույթի մրցանակաբաշխությունը, և «ԿԱՄՔ» ժողովածուի շնորհանդեսը։
Արդեն երեք տարի «Կողբ» հիմնադրամի և «Մարտական եղբայրություն» միաբանության նախաձեռնությամբ անցկացվում է «ԿԱՄՔ․ Վ. Սարգսյան» գրական մրցույթը։ Այս տարի մրցույթին մասնակցելու հայտ էր ներկայացրել 21 մասնակից, որոնցից 13-ը՝ պատերազմների մասնակիցներ։
Հանձնաժողովի որոշմամբ հատուկ մրցանակների արժանացան երկու հեղինակ՝ Արցախյան պատերազմի մասնակից, ընմբիշ Սուրեն Շաբոյանը իր` «421/731 Կյանքը քո գրկում» վիպակով և արձակագիր, լրագրող, կինոսցենարիստ, ՀՀ պաշտպանության մարտական գործողությունների մասնակից Վանուշ Շերմազանյանը՝ «Ժոկոն, Վազգենն ու Բրիթիշ Փեթրոլիումը» ստեղծագործությամբ։
Հատուկ մրցանակները հանձնեց «Կողբ» հիմնադրամի հոգաբարձուների խորհրդի նախագահ Արման Բարսեղյանը։ Մրցանակակիրները ստացան 150.000-ական դրամ, դիպլոմներ և «ԿԱՄՔ» ժողովածուն:
Արման Բարսեղյանը հիմնադրամի անունից շնորհավորեց բոլորին ՀՀ անկախության օրվա կապակցությամբ՝ ընդգծելով, որ պատահական չէ հենց այս օրը Վազգեն Սարգսյանի անվան գրական մրցույթի մրցանակաբաշխությունը։
Հրանտ Տեր-Աբրահամյանը իր խոսքում նշեց, որ գրականությունը պիտի լինի կյանքի մասին։ Արվեստը պետք է արտացոլի ոչ թե ուրիշների, այլ մեր կյանքը։ Իսկ ի՞նչ ավելի խորը ապրում է եղել մեր կյանքում, քան 2020 թվականի պատերազմը։ Այս ամենը պետք է ասվի, որովհետև ցավի պոզիտիվ վերապրումը շատ կարևոր է։
Մրցանակաբաշխության ընթացքում տեղի ունեցավ նաև «ԿԱՄՔ» ժողովածուի շնորհանդեսը։ Գրքում տեղ են գտել «ԿԱՄՔ․ Վ. Սարգսյան» գրական առաջին և երկրորդ մրցույթների հաղթողների և հանձնաժողովի ընտրած մասնակիցների 20 ստեղծագործություններ։ Ժողովածուի առաջաբանի հեղինակը պատմաբան Հրանտ Տեր-Աբրահամյանն է, խմբագիրը՝ Լեռնիկ Դալլաքյանը։
Գրքի օրինակներ հանձնվեցին այս տարվա մրցանակակիրներին, հանձնաժողովի անդամներին և ժողովածուում ներառված հեղինակներին։
• Երրորդ մրցանակը (300.000 դրամ) հանձնվեց հաշվապահ, ֆինանսիստ Ռուդիկ Պողոսյանին իր` «Ճակատագրական ընտրություն» ստեղծագործության համար։
• Երկրորդ մրցանակը (500.000 դրամ) ստացավ 44-օրյա պատերազմի մասնակից, գրող, երգահան, ճարտարագետ Արսեն Համբարյանը իր` «Արձակաուրդ» վիպակով։
• Առաջին մրցանակը (700.000 դրամ) շնորհվեց գրող, սցենարիստ, 44-օրյա պատերազմի մասնակից Սարգիս Հովսեփյանին իր` «Տափակ քարը» պատմվածքի համար։
Արդեն երկրորդ տարին մրցանակը հանձնում է «ԿԱՄՔ․ Վ. Սարգսյան» գրական առաջին մրցույթի հաղթող, 44-օրյա պատերազմի մասնակից Նարեկ Վարդանյանը, որի «Սովորական հայրենիք» ստեղծագործությունը նույնպես ներառված է ժողովածուում։
Նարեկն իր խոսքում ընդգծեց, որ մենք միշտ խոսում ենք պարտությունից ու հաղթանակից, բայց իրեն թվում է՝ այստեղ ավելի մեծ բան է ամփոփված։
Սա պարտությունից և հաղթանակից բարձր ու մնայուն արժեք է՝ հայ մարդու խիղճը։ Հիշեցնենք, որ «ԿԱՄՔ․ Վ. Սարգսյան» գրական մրցույթը կազմակերպվում է «Կողբ» հիմնադրամի և «Մարտական եղբայրություն» միաբանության ջանքերով:
