Եվրամիությունը կկայացնի իր սեփական որոշումները Հնդկաստանի և Չինաստանի նկատմամբ մաքսատուրքերի վերաբերյալ, ասել է Եվրահանձնաժողովի նախագահ Ուրսուլա ֆոն դեր Լեյենը բելգիական Le Soir թերթին տված հարցազրույցում՝ ԱՄՆ նախագահ Դոնալդ Թրամփի այս կոչից հետո։
«ԵՄ-ն կկայացնի իր սեփական որոշումները։ Այս խնդրանքը կապված է նախագահի [Թրամփի] ցանկության հետ՝ մեծացնել ճնշումը Ռուսաստանի վրա՝ պատերազմը դադարեցնելու համար… Ռուսաստանին բանակցային սեղանի շուրջ բերելու համար։ Ահա թե ինչու ես հենց նոր առաջարկեցի մեր 19-րդ պատժամիջոցների փաթեթը», — պատասխանել է ֆոն դեր Լեյենը ԵՄ-ի՝ Թրամփի կոչին արձագանքի մասին հարցին։
Եվրահանձնաժողովի նախագահը հաստատել է, որ Եվրոպան կշարունակի «համակարգել ջանքերը Ատլանտյան օվկիանոսի երկու կողմերում և G7 երկրների հետ»։
Նա նաև ընդգծել է գործընկերության ամրապնդման անհրաժեշտությունը, այդ թվում՝ Հնդկաստանի հետ։
«Հաշվի առնելով երկրի աճող դերը Հնդկա-խաղաղօվկիանոսյան տարածաշրջանի անվտանգության ապահովման գործում, ԵՄ-ի և Հնդկաստանի միջև ավելի սերտ համագործակցությունն ավելի կարևոր է, քան երբևէ», — նշել է ֆոն դեր Լեյենը՝ բացատրելով ԵՄ-Հնդկաստան նոր ռազմավարական օրակարգի հայտարարությունը, որի առաջնահերթություններից մեկը փոխադարձ պաշտպանության և անվտանգության ամրապնդումն է։
ԵՄ-ն նպատակ ունի մինչև 2025 թվականի վերջը կնքել նոր ազատ առևտրի համաձայնագիր, որը «կօգտակար լինի երկու կողմերի բիզնեսների համար»։
Հնդկաստանի նկատմամբ ԱՄՆ-ի ընդհանուր մաքսատուրքը, օգոստոսի վերջին 25% աճից հետո, հասել է 50%-ի, որը պատմության մեջ ամենաբարձրերից մեկն է։ ԱՄՆ նախագահը մաքսատուրքի բարձրացումը պայմանավորել է Հնդկաստանի կողմից ռուսական նավթի շարունակական գնումներով։
Վաշինգտոնը Չինաստանից բոլոր ներմուծումների մաքսատուրքերը բարձրացրել է մինչև 145%։ Պեկինը սահմանել է սիմետրիկ 125% մաքսատուրք։ Մայիսին Ժնևում կայացած հանդիպումների ժամանակ կողմերը համաձայնել են չինական ապրանքների նկատմամբ ԱՄՆ մաքսատուրքերը 145%-ից իջեցնել մինչև 30%, իսկ ամերիկյան ապրանքների նկատմամբ չինական մաքսատուրքերը՝ 125%-ից մինչև 10%՝ 90 օրվա ընթացքում։ Օգոստոսին Չինաստանը և ԱՄՆ-ն երկարաձգել են մաքսատուրքերի դադարը ևս երեք ամսով։
Բաժանորդագրվեք մեր ալիքին Telegram-ում
