Ռուսաստանի կողմից ստեղծված հսկայական ստվերային նավատորմը մեղմացնում է արևմտյան պատժամիջոցների ազդեցությունը, որոնք կարող են երկարաժամկետ հետևանքներ ունենալ համաշխարհային տնտեսության համար, հաղորդում է The New York Times-ը։
Ինչպես նշում է հրատարակությունը, ստվերային նավատորմի նավերը Ռուսաստանից նավթ են տեղափոխում, և եթե դրանք ենթարկվում են պատժամիջոցների, նրանք պարզապես գրանցվում են այլ դրոշի ներքո, փոխում են իրենց անունը և թաքցնում, թե որտեղ են բեռնել նավթը։
«Ստվերային նավատորմի նավերը գտել են սև ցուցակը շրջանցելու եղանակներ։ Նրանք բեռնաթափում են ծովում կամ «փոխադրում դրոշը»՝ փոխելով իրենց գրանցման համարները՝ իրենց ինքնությունը թաքցնելու համար», — գրում է հրատարակությունը։
«Շատերը ցանկանում են ընտրել հեշտ ճանապարհը՝ պատժամիջոցներ կիրառել, բայց իրականում մենք լուրջ խնդիր ենք ստեղծել։ Պատժամիջոցները նրանց չեն զրկում բիզնեսից։ Դրանք նրանց զրկում են օրինական բիզնեսից», — ասել է ծովային անվտանգության փորձագետ և I.R. Consilium հետազոտական ընկերության հիմնադիր Իան Ռալբին։
Ստվերային նավատորմի հետ տեղի ունեցողը կարող է ազդարարել համաշխարհային առևտրային կարգի փոփոխության մասին, որտեղ պատժամիջոցների տակ գտնվող երկրները, ինչպիսիք են Իրանը և Ռուսաստանը, կարող են իրենց նավթը մատակարարել Հնդկաստանին և Չինաստանին: Միևնույն ժամանակ, ստվերային նավատորմը արագորեն աճում է: Այն ներկայումս կազմում է ծովում գտնվող բոլոր նավթատարների 17%-ը՝ 940 նավ, ինչը 45%-ով ավելի է նախորդ տարվա համեմատ:
Ինչպես զգուշացնում է Ռալբին, Արևմուտքը Ռուսաստանին դրդում է ստեղծել հսկայական, չկարգավորվող նավթային շուկա:
«Այս միտումը հանգեցրել է անօրինական նավագնացության հսկայական տնտեսության ի հայտ գալուն, որը, որոշ փորձագետների կարծիքով, կարող է տևել պատերազմից հետո: Սա կարող է ճանապարհ հարթել երկրների համար՝ շարունակելու շրջանցել գործող կարգը», — գրում է հրատարակությունը:
