Ղազախստանի ազգային «KazMunayGas» ընկերությունը վերսկսել է նավթի արտահանումը Բաքու-Թբիլիսի-Ջեյհան (BTC) խողովակաշարով։ Այս մասին հայտարարվել է ընկերության կայքում։
«Սեպտեմբերի 13-ին Ակտաու նավահանգստից Բաքու-Թբիլիսի-Ջեյհան ուղղությամբ առաքվել է 8800 տոննա Քաշագանի նավթ, իսկ հաջորդ առաքումը նախատեսված է սեպտեմբերի 20-ին», — հայտնել է ընկերությունը։
Հիշեցնենք, որ այս երթուղով ղազախական նավթի առաքումները դադարեցվել էին օգոստոսին, երբ ադրբեջանական նավթի որոշ առաքումներում հայտնաբերվել էին օրգանական քլորիդների հետքեր։ SP Global Commodities at Sea-ի տվյալներով՝ «Azeri Light հում նավթի աղտոտումը խաթարել է Միջերկրածովյան արտահանման համակարգը», խոչընդոտելով Ղազախստանից և Թուրքմենստանից 1800 կիլոմետրանոց BTC խողովակաշարով առաքումները։ Ղազախստանը ստիպված էր ավելի շատ հույսը դնել Կասպյան խողովակաշարերի կոնսորցիումի (CPC) երթուղու վրա, որն ունի օրական 1.8 միլիոն բարել հզորություն և անցնում է Ռուսաստանի հարավով։
Սովորաբար, Կասպից ծովով Բաքու մատակարարումները կատարվում են Ղազախստանի խոշորագույն հանքավայրերից՝ Թենգիզից և Քաշագանից։
Բաքու-Թբիլիսի-Ջեյհան խողովակաշարը տեղափոխում է Ազերի-Չիրագ-Գյունեշլի հանքավայրերի բլոկից նավթ, Շահ Դենիզ հանքավայրից կոնդենսատային նավթ և Ադրբեջանի պետական նավթային ընկերության նավթ։
Խողովակաշարը նաև նավթ է տեղափոխում Կասպից ծովի տարածաշրջանի մի շարք այլ երկրներից։ Բաքու-Թբիլիսի-Ջեյհան խողովակաշարի հզորությունը տարեկան ավելի քան 50 միլիոն տոննա նավթ է։
Բաժանորդագրվեք մեր ալիքին Telegram-ում
