Գալստյանը խոստովանեց՝ առաջին անգամ է լսում նման խնդրի մասին, խնդրեց իրեն տեղեկություն տալ և եթե նման դեպքեր կան, ինքը հետամուտ կլինի խնդրի լուծմանը:
Պատգամավորի հաջորդ հարցը դարձյալ վերաբերում էր ԼՂ-ից բռնի տեղահանված մեր հայրենակիցներին, Դանիելյանը ասաց՝ շատ բանկեր հրաժարվում են նրանց վարկ տրամադրել՝ պատճառաբանելով, որ ունեցել են ԼՂ-ում վարկային պարտավորություններ:
«Ես հասկանում եմ, որ ամեն մի պատմություն առանձին մարդու ճակատագրի պատմություն է, այսինքն՝ ես չեմ ուզում համախմբել խնդիրը, բայց, մեծ հաշվով, 2020 թվականի պատերազմից հետո բանկային համակարգում ստեղծվել է մի իրավիճակ, որ բանկային համակարգը անընդհատ փորձում է օգնել թե՛ պատերազմի մասնակիցներին, թե՛ հաշմանդամներին, թե՛ ԼՂ-ից տեղահանված մեր հայրենակիցներին:
Մենք փորձում ենք սիստեմատիկ ձևով ինչ-որ հարցեր լուծել, բայց դա բնավ չի ենթադրում, որ չեն կարող լինել առանձին դեպքեր, որոնց վերաբերյալ անհատական մոտեցումներ է պետք ցուցաբերել:
Բանկային համակարգը միլիարդավոր դրամների զիջումներ ու դուրսգրումներ է արել, բայց եթե կան անհատական դեպքեր, որոնք կապված են մարդու կողմից ինչ-որ խնդիրներ ունենալուն, պետք է առանձին նայել ու լուծում տալ»,- ասաց նա:
Մարտին Գալստյանի խոսքով՝ հարցը համակարգային չէ, եթե լիներ, ինքը տեղյակ կլիներ խնդրի մասին:
