Եվրոպայի ամենաարագ սուպերհամակարգիչը գործարկվեց

Եվրոպայի ամենաարագ սուպերհամակարգիչը՝ Jupiter համակարգը, գործարկվեց Գերմանիայի Յուլիխ քաղաքում ուրբաթ՝ սեպտեմբերի 5-ին։ Այն նախատեսված է արհեստական ​​բանականության զարգացմանը, մեծ տվյալների հավաքածուների մոդելավորմանը և վերլուծությանը հզոր խթան հաղորդելու համար, հաղորդում է DW-ն։

Ինչպես նշում է Յուլիխի հետազոտական ​​կենտրոնը, սա Եվրոպայում առաջին համակարգիչն է, որն ունի վայրկյանում ավելի քան 1 տրիլիոն գործողություն կատարելու հնարավորություն, որը համեմատելի է մոտ 1 միլիոն ժամանակակից սմարթֆոնների հզորության հետ։ Jupiter համալիրը զբաղեցնում է ավելի քան 2300 քառակուսի մետր տարածք և բաղկացած է մոտ 50 կոնտեյներային մոդուլից։ Համաշխարհային վարկանիշում այն ​​ներկայումս զբաղեցնում է չորրորդ տեղը արագությամբ։

Պաշտոնական գոծարկման արարողությանը ներկա էին Գերմանիայի կանցլեր Ֆրիդրիխ Մերցը և Հյուսիսային Հռենոս-Վեստֆալիայի վարչապետ Հենդրիկ Վյուստը։ Վյուստի խոսքով՝ էքսասկալ սուպերհամակարգիչը կդառնա կարևոր հանգրվան տարածաշրջանի կառուցվածքային վերակառուցման մեջ և «ածխից արհեստական ​​բանականության» անցման խորհրդանիշ։ Նա նաև ընդգծեց դրա կարևորությունը Եվրոպայի թվային ինքնիշխանության համար. «Ազատ Արևմուտքը պետք է դառնա ազատ և հուսալի արհեստական ​​բանականության հայրենիք»։

«Յուպիտեր» համակարգը աշխատում է վերականգնվող էներգիայի աղբյուրներով և ճանաչվում է որպես աշխարհում ամենաէներգաարդյունավետը։ Նախատեսվում է այն օգտագործել բաց լեզվով մոդելներ մշակելու, մարդու ուղեղի իրատեսական սիմուլյացիաներ ստեղծելու և կլիմայական մանրամասն կանխատեսումներ կատարելու համար։

«Յուպիտեր» անվանումը նշանակում է «Համատեղ ձեռնարկում նորարարական և փոխակերպող էքսասկալ հետազոտությունների համար» (Joint Undertaking Pioneer for Innovative and Transformative Exascale Research):

Նախագիծը ֆինանսավորվում է մոտ 500 միլիոն եվրոյով. միջոցների կեսը հատկացվում է EuroHPC JU համաեվրոպական նախաձեռնության շրջանակներում, մնացածը տրամադրվում է Գերմանիայի կառավարության և Հյուսիսային Հռենոս-Վեստֆալիայի երկրամասի իշխանությունների կողմից։