Եվրոպայում Google-ին հսկայական տուգանք է նշանակվել․ Թրամփը սպառնում է պատասխանել

Ամերիկյան Google կորպորացիան Եվրամիությունում տուգանվել է գրեթե 3 միլիարդ եվրոյով (3.5 միլիարդ դոլար)՝ իր գերիշխող դիրքը «չարաշահելու» և իր գովազդային հարթակներին մրցակցային առավելություն տրամադրելու համար։ Այս մասին հաղորդել է Bloomberg-ը՝ հղում անելով Եվրահանձնաժողովի փոխնախագահ Թերեզա Ռիբերայի հայտարարությանը, որը պատասխանատու է մրցակցության հարցերով։

Եվրահանձնաժողովը հայտարարել է, որ Google-ը պետք է վերջ դնի ներկայիս գործելակերպին։

«Երբ շուկաները ձախողվում են, պետական ​​հաստատությունները պետք է գործեն՝ գերիշխող խաղացողներին իրենց իշխանությունը չարաշահելուց կանխելու համար», — ասել է Եվրահանձնաժողովի փոխնախագահը՝ ընդգծելով, որ «իրական ազատությունը նշանակում է հավասար խաղադաշտ, որտեղ բոլորը հավասարապես մրցակցում են, և քաղաքացիներն ունեն ընտրության իրական իրավունք»։

Google-ը, իր հերթին, խոստացել է բողոքարկել Եվրահանձնաժողովի որոշումը։ Փոխնախագահ Լի-Էն Մալհոլանդն ասել է, որ այն «սահմանում է անարդար տուգանք և պահանջում է փոփոխություններ, որոնք կվնասեն հազարավոր եվրոպական ընկերություններին՝ դժվարացնելով նրանց համար շահույթ ստանալը»։

Նախագահ Դոնալդ Թրամփը հայտարարել է, որ Միացյալ Նահանգները կարձագանքի ԵՄ-ի կողմից Google-ին 3.5 միլիարդ դոլարով տուգանելու «անարդար որոշմանը»։

Google-ը բազմիցս մեղադրվել է տարբեր երկրների իշխանությունների կողմից մենաշնորհի մեջ։ 2024 թվականին ԱՄՆ դատարանը պարզեց, որ ընկերությունն անօրինական կերպով մենաշնորհել է որոնման շուկան. իշխանությունները պահանջեցին, որ կորպորացիան բաժանվի և Chrome զննարկիչը վաճառվի։ Նույն որոշմամբ դատավորը որոշեց, որ Google-ը գովազդի շուկայում անբարենպաստ դրության մեջ է դրել իր մրցակիցներին։

Հետագայում դատարանը թույլ տվեց կորպորացիային չվաճառել իր Chrome զննարկիչը կամ Android օպերացիոն համակարգը, բայց հրամայեց նրան կիսվել որոնման տվյալներով մրցակիցների հետ։

Սեպտեմբերի սկզբին Ֆրանսիայի տվյալների պաշտպանության մարմինը Google-ին տուգանեց 325 միլիոն եվրոյով՝ cookie-ների կանոնները չպահպանելու համար։