Չինաստանը Ռուսաստանի հետ սահմանին չոր նավահանգիստ է կառուցում

Երկրի հյուսիս-արևելքում՝ Հեյլունցզյան նահանգում գտնվող չինական սահմանային Սուիֆենհե քաղաքում ակտիվորեն կառուցվում է չին-ռուսական նոր միջազգային բեռնափոխադրման նավահանգիստ։

Այս մասին օգոստոսի 23-ին հայտնել է «Սինհուա» գործակալությունը՝ հղում անելով տեղական իշխանություններին։

Նախագծի տարածքը կազմում է 23,738 քառակուսի մետր, իսկ ընդհանուր ներդրումը գնահատվում է 120 միլիոն յուան, որը մոտավորապես հավասար է 17 միլիոն դոլարի՝ Չինաստանի Կենտրոնական բանկի ներկայիս փոխարժեքով։

Համալիրի շրջանակներում նախատեսվում է ստեղծել ժամանակակից, բարձրակարգ միջազգային կենտրոն ապրանքների ցուցադրման, պահպանման և վերաբաշխման համար, ինչպես նաև կառուցել «աստղային» դասի գրասենյակային շենքեր և թեմատիկ հյուրանոցներ։

Սուիֆենհեն սահմանակից է Ռուսաստանի Պրիմորիեի երկրամասին։ Հարբինի մաքսային ծառայության տվյալներով՝ 2025 թվականի հունվարից հուլիս ընկած ժամանակահատվածում Ռուսաստանի և Հեյլունցզյան նահանգի միջև առևտրաշրջանառությունն աճել է 3.5%-ով և հասել 139.61 միլիարդ յուանի (մոտ 19.5 միլիարդ դոլարի):