Ռուսաստանը զգալի դիվանագիտական ջանքեր է գործադրում Հնդկաստանի հավանությունը շահելու համար էներգակիրների գնումների հարցում, քանի որ վախենում է երկրորդական պատժամիջոցներից, ասվում է Պատերազմի ուսումնասիրության ամերիկյան ինստիտուտի զեկույցում։
Մասնավորապես, զեկույցում նշվում է Ռուսաստանի նախագահ Վլադիմիր Պուտինի և արտգործնախարար Սերգեյ Լավրովի երեկվա հանդիպումը Հնդկաստանի արտաքին գործերի նախարար Սուբրամանյան Ջայշանկարի հետ։
Վերլուծաբանները նշում են, որ նրանք քննարկել են ռուս-հնդկական հարաբերությունները, ինչպես նաև էներգետիկայի, այդ թվում՝ նավթի, ածխաջրածինների և միջուկային էներգիայի ոլորտում տնտեսական ներդրումների ընդլայնումը։
Մեկ օր առաջ՝ օգոստոսի 20-ին, Ռուսաստանի էներգետիկայի փոխնախարար Ռոման Մարշավինը հանդիպել է Հնդկաստանի նավթի և բնական գազի փոխնախարար Պանկաջ Ջայնի հետ՝ էներգետիկ առևտրի ոլորտում համագործակցության ընդլայնման հարցը քննարկելու համար։
Լավրովը նաև հանդիպումից հետո համատեղ մամուլի ասուլիս է անցկացրել Ջայշանկարի հետ և հայտարարել, որ Պուտինը, հավանաբար, կայցելի Հնդկաստան մինչև 2025 թվականի վերջը։
Հնդկաստանի արտաքին գործերի նախարարը, իր հերթին, ասել է, որ Հնդկաստանը կարծում է, որ Նյու Դելիի և Մոսկվայի միջև հարաբերությունները «Երկրորդ համաշխարհային պատերազմից ի վեր աշխարհի խոշորագույն հարաբերություններից ամենակայուններից մեկն են եղել»։
Հաշվի առնելով սա, ինստիտուտը գրում է, որ Պուտինը և այլ բարձրաստիճան ռուս պաշտոնյաներ զգալի ժամանակ և էներգիա են ծախսում Հնդկաստանի հետ հարաբերությունները կայունացնելու և ամրապնդելու վրա: Սա ցույց է տալիս, որ Մոսկվան Նյու Դելին դիտարկում է որպես եկամտի կարևոր աղբյուր։
«ISW-ն շարունակում է գնահատել, որ երկրորդական պատժամիջոցները, հավանաբար, ավելի կազդեն Ռուսաստանի տնտեսության վրա՝ խաթարելով Ռուսաստանի նավթային եկամուտները, որոնք անհրաժեշտ են Կրեմլի պատերազմը Ուկրաինայի դեմ ֆինանսավորելու համար», — գրում են փորձագետները։
