Չինաստանը օգտվում է պահից. ավելացնում է ռուսական նավթի գնումները

Չինական նավթավերամշակման գործարանները ավելացրել են ռուսական Urals նավթի գնումները, այն բանից հետո, երբ Հնդկաստանը կրճատել է հումքի ներմուծումը ԱՄՆ-ի կողմից բարձրացված մաքսատուրքերի ֆոնին, հաղորդում է Bloomberg-ը։

Kpler-ի (ֆրանսիական ընկերություն, որը մասնագիտանում է ապրանքային շուկաների վերաբերյալ տվյալների հավաքագրման մեջ) տվյալներով՝ օգոստոսին Չինաստան Urals-ի մատակարարումները հասել են օրական մոտ 75,000 բարելի, ինչը գրեթե կրկնակի ավելի է, քան տարեսկզբից ի վեր միջին մակարդակը՝ 40,000 բարել։ Միևնույն ժամանակ, Հնդկաստան արտահանումը նվազել է մինչև օրական 400,000 բարել՝ միջին 1.18 միլիոնի համեմատ։

ԱՄՆ նախագահ Դոնալդ Թրամփը օգոստոսի սկզբին հայտարարեց Նյու Դելիի կողմից ռուսական նավթի գնումներին ի պատասխան Միացյալ Նահանգներ մատակարարվող հնդկական ապրանքների վրա լրացուցիչ 25 տոկոս մաքսատուրք սահմանելու մասին, որի արդյունքում ընդհանուր դրույքաչափը բարձրացել է մինչև 50%։ Սպիտակ տունը հայտարարել է, որ Հնդկաստանը, հումք գնելով, ֆինանսավորում է Ռուսաստանի պատերազմը Ուկրաինայի դեմ։

ԱՄՆ-ն նմանատիպ միջոցներ չի ձեռնարկել Չինաստանի դեմ, որի հետ առևտրային բանակցություններ են ընթանում։

Kpler-ի և Energy Aspects-ի տվյալներով՝ չինական վերամշակման գործարանները հոկտեմբեր և նոյեմբեր ամիսների մատակարարման համար գնել են Urals նավթի 10-15 խմբաքանակ, ինչը սովորականից ավելին է։ Bloomberg-ը օգոստոսի սկզբին հայտնել էր, որ չինացի գնորդներին հոկտեմբերյան ֆյուչերսները առաջարկվել են մեկ բարելի համար 1.5 դոլար զեղչով՝ համեմատած Brent-ի հետ (օգոստոսի 19-ի առավոտյան ICE բորսայում 66.2 դոլար արժողությամբ)։