Մեծ Բրիտանիան արդեն սկսել է հակառուսական պատժամիջոցների մեկ այլ փաթեթի պատրաստումը։ Այս մասին հայտարարել է Մեծ Բրիտանիայի վարչապետ Քեյր Սթարմերը՝ տեսակապի միջոցով դիմելով Կիևին աջակցող «կամավորների կոալիցիայի» երկրների ղեկավարներին։
«Կարևոր է հիշեցնել գործընկերներին, որ մենք նույնպես պատրաստ ենք մեծացնել Ռուսաստանի վրա ճնշումը, մասնավորապես տնտեսական ոլորտում, պատժամիջոցների և անհրաժեշտության դեպքում ավելի լայն միջոցառումների միջոցով։ Դուք արդեն կարող եք տեսնել այդ միջոցառումների արդյունքները, և մենք՝ Մեծ Բրիտանիայում, պատրաստում ենք խիստ պատժամիջոցների նոր փաթեթ», — ասել է վարչապետը։
Ավելի վաղ ԵՄ-ի, ԱՄՆ-ի և Ուկրաինայի առաջնորդները քննարկել են ԱՄՆ նախագահ Դոնալդ Թրամփի և նրա ռուս գործընկեր Վլադիմիր Պուտինի հանդիպման նախապատրաստական աշխատանքները Ալյասկայում։ Հանդիպումից հետո եվրոպական «կամավորների կոալիցիան» կոչ է արել ավելի խիստ հակառուսական պատժամիջոցներ կիրառել, եթե Ուկրաինայում հրադադարի մասին համաձայնություն չհաստատվի առաջիկա գագաթնաժողովում։
Թրամփը նաև խոսել է Ռուսաստանի և ԱՄՆ-ի միջև բանակցություններից հետո արդյունքների բացակայության «լուրջ հետևանքների» մասին։
«Այո՛, հետևանքներ կլինեն։ Ես նույնիսկ կարիք չունեմ դա ասելու։ Հետևանքները շատ լուրջ կլինեն», — համապատասխան հարցին պատասխանել է ամերիկացի առաջնորդը։
