Ֆրանսիան խեղդվում է պարտքերի մեջ

Ֆրանսիան գտնվում է ծանր տնտեսական իրավիճակում, երկրի պետական պարտքը ամեն վայրկյան աճում է 5000 եվրոյով։ Այս մասին հայտարարել է Հանրապետության վարչապետ Ֆրանսուա Բայրուն իր YouTube ալիքում քաղաքացիներին ուղղված տեսաուղերձում։

«Ամեն վայրկյան, օր ու գիշեր, Ֆրանսիայի պարտքը աճում է 5000 եվրոյով», — ասել է կառավարության ղեկավարը։

Նրա խոսքով՝ երկրի պետական պարտքն արդեն հասել է 3.4 տրիլիոն եվրոյի։

«Սա այնպիսի գումար է, որը դժվար է նույնիսկ պատկերացնել», — ընդգծել է Բայրուն։

Վարչապետը չափազանց պարտքը անվանել է Ֆրանսիայի տնտեսության համար գլխավոր սպառնալիք և հայտարարել է ծախսերի կրճատմանն ուղղված անհապաղ միջոցներ ձեռնարկելու անհրաժեշտության մասին։ Նա նաև մատնանշել է Ֆրանսիայի պետական պարտքի սպասարկման արժեքի արագ աճը։

«2026 թվականին պարտքի տոկոսների վճարման արժեքը կաճի 8 միլիարդ եվրոյով։ Իսկ 2027 թվականին, եթե ոչինչ չձեռնարկվի, այն կկազմի 10 միլիարդ եվրոյով ավելի։ Եվ եթե մենք շարունակենք ոչինչ չանել, ապա մինչև 2029 թվականը այդ ծախսերի չափը կհասնի տարեկան 100 միլիարդ եվրոյի», — նշել է կառավարության ղեկավարը։ Պարտքի սպասարկման արժեքը 2024 թվականին կազմել է 59 միլիարդ եվրո։

Բայրուն նաև հավելել է, որ Ֆրանսիայում բյուջետային անհավասարակշռությունը շարունակվում է ավելի քան 50 տարի, ինչը անընդունելի է։

«Ֆրանսիայում վերջին հավասարակշռված բյուջեն ներկայացվել է, դժվար է նույնիսկ մտածել դրա մասին, 1974 թվականին», — ասել է վարչապետը։

Կառավարության ղեկավարը նախկինում զգուշացրել էր համաքաղաքացիներին ազգային բյուջեի կայունացմանը մասնակցելու անհրաժեշտության մասին, որի պարտքը հասել է անընդունելի մակարդակի։ Բայրուի ներկայացրած ծրագրի համաձայն՝ ընդհանուր առմամբ, տարբեր միջոցառումների միջոցով, կառավարությունը նախատեսում է 2026 թվականին խնայել 43.8 միլիարդ եվրո՝ բյուջեի դեֆիցիտը ՀՆԱ-ի 4.6%-ին սահմանափակելու համար, մինչդեռ 2024 թվականին այդ ցուցանիշը կազմել է 5.8%:

Բայրուն նշել է, որ սկզբում նախատեսել էր ծախսերը կրճատել 40 միլիարդ եվրոյով, սակայն ստիպված է եղել բարձրացնել նշաձողը պաշտպանական ծախսերը մեծացնելու ցանկության պատճառով: Նա նաև ասել է, որ Ֆրանսիայի իշխանությունները մտադիր են հրաժարվել կենսաթոշակների և այլ սոցիալական նպաստների բարձրացումից 2026 թվականին՝ 7.1 միլիարդ եվրո խնայելու և պետական պարտքի աճը զսպելու փորձով: