Ադրբեջանական բնական գազը Թուրքիայի միջոցով կսկսի հոսել Սիրիա արդեն օգոստոսի 1-ից։ Այս մասին հաղորդում է թուրքական «Աքշամ» հրատարակությունը՝ հղում անելով նախագծին մոտ կանգնած աղբյուրներին։
Առաջին փուլում նախատեսվում է տարեկան մատակարարել 1.2 միլիարդ խորանարդ մետր գազ։ Վառելիքը հիմնականում կօգտագործվի Սիրիայի Հալեպ և Հոմս նահանգների համակցված ցիկլի էլեկտրակայաններում՝ էլեկտրաէներգիա արտադրելու համար։ Նախագծի հիմնական նպատակն է նպաստել երկրի ավերված էներգետիկ ենթակառուցվածքների վերականգնմանը, որը տուժել է տարիներ շարունակ տևած հակամարտությունից։
Մատակարարումները կիրականացվեն թուրքական Քիլիս քաղաքից մինչև Սիրիայի սահման ձգվող խողովակաշարով։ Հաղորդվում է, որ թուրքական կողմն արդեն ավարտել է խողովակաշարի անցկացումը մինչև սահման, իսկ սիրիական կողմը կատարել է բոլոր տեխնիկական կապերը։
Թուրքիայի պետական էներգետիկ ընկերությունը՝ BOTAŞ-ը և Ադրբեջանի SOCAR-ը, անցկացնում են օբյեկտի շահագործումը սկսելու համար անհրաժեշտ վերջնական փորձարկումներն ու ստուգումները։
«Ադրբեջանի որոշումը կնպաստի ինչպես Սիրիայի հետհակամարտական վերականգնմանը, այնպես էլ Թուրքիան տարածաշրջանային էներգետիկ հանգույցի վերածելու ծրագրերին», — գրում է թերթը՝ նշելով, որ Քիլիսից մինչև Սիրիայի հետ սահմանը խողովակաշարն արդեն կառուցվել է։ Դամասկոսը նաև ձեռնարկել է բոլոր անհրաժեշտ քայլերը գազ ներմուծելու համար։
