Չինաստանը սպառնում է պատասխան քայլերով ԵՄ-ի կիրառված պատժամիջոցների նկատմամբ

Եվրոպական Միության կողմից Չինաստանի որոշ բանկերի և ընկերությունների նկատմամբ սահմանված վերջին պատժամիջոցները առաջացրել են Պեկինի բողոքը և խոստում՝ իրականացնել պատասխան գործողություններ՝ սեփական բիզնեսը պաշտպանելու համար։ Ինչպես հաղորդում է Bloomberg-ը, ուրբաթ օրը ԵՄ-ն նոր պատժամիջոցների փաթեթի շրջանակում սահմանափակումներ է կիրառել երկու չինական բանկերի և Չինաստանում հիմնված հինգ ընկերությունների նկատմամբ՝ Ռուսաստանի դեմ ուղղված սահմանափակումների շրջանակում։

Չինաստանի առևտրի նախարարությունը երկուշաբթի օրը հայտարարել է, որ այս պատժամիջոցները լուրջ վնաս են հասցրել Չինաստանի առևտրային, տնտեսական և ֆինանսական կապերին։ Այն նաև նշել է, որ Չինաստանը կձեռնարկի անհրաժեշտ քայլեր՝ պաշտպանելու չինական ընկերությունների և ֆինանսական հաստատությունների օրինական իրավունքները և շահերը։

Ըստ Bloomberg-ի, սա առաջին դեպքն է 2022 թվականին հակամարտության մեկնարկից ի վեր, երբ չինական բանկերը հայտնվում են ԵՄ պատժամիջոցների տակ։ Եվրոպական խորհրդի հայտարարության համաձայն՝ սահմանափակումները վերաբերում են Heihe Rural Commercial Bank Co. և Heilongjiang Suifenhe Rural Commercial Bank Co. բանկերին՝ կրիպտոարժույթային ծառայություններ մատուցելու համար, որոնք, ըստ ԵՄ-ի, խաթարում են պատժամիջոցների արդյունավետությունը։

Bloomberg-ը նշում է, որ Չինաստանի սերտ կապերը Ռուսաստանի հետ նախկինում նույնպես դարձել են ԱՄՆ-ի կողմից նմանատիպ պատժամիջոցների պատճառ։ Չինաստանի որոշ պետական բանկեր 2023 թ. սկզբից սկսած խստացրել են ֆինանսավորման պայմանները ռուսական հաճախորդների համար, երբ ԱՄՆ-ն սկսեց կիրառել երկրորդային պատժամիջոցներ այն օտարերկրյա ֆինանսական կազմակերպությունների դեմ, որոնք օգնում էին Մոսկվայի ռազմական գործունեությանը։

Ավելին՝ 2022 թ. փետրվարին Industrial & Commercial Bank of China Ltd.-ը և Bank of China Ltd.-ը սահմանափակել էին ֆինանսավորումը ռուսական հումքային մատակարարումների համար։ Bloomberg-ը նշել է, որ այս որոշումն ընդունվել էր նույնիսկ այն ժամանակ, երբ Արևմուտքի պատժամիջոցները դեռ չէին անդրադառնում Ռուսաստանի էներգետիկ ոլորտին։ Չինաստանի խոշորագույն պետական բանկերը նախկինում նույնպես պահպանում էին ԱՄՆ պատժամիջոցները Իրանի և Հյուսիսային Կորեայի նկատմամբ՝ չկորցնելու ԱՄՆ դոլարով հաշվարկային համակարգին մուտք գործելու հնարավորությունը։