Հարավային Կորեայի խորհրդարանի անդամ Մին Բյոն Դոկը հայտարարել է, որ երկրի խոշորագույն կրիպտոբորսա Upbit-ին կարող է սպառնալ մինչև 183 տրիլիոն վոն (մոտ 140 միլիարդ դոլար) տուգանք՝ հաճախորդների նույնականացման պահանջների (KYC) զանգվածային խախտումների համար։ Տվյալ գնահատականը հիմնված է ֆինանսական վերահսկող մարմնի՝ FIU-ի կողմից իրականացված ստուգման արդյունքների վրա։
FIU-ի տվյալներով՝ 2025թ. փետրվարին արձանագրվել է գրեթե 9.6 միլիոն խախտում՝ 10 տարբեր կատեգորիաներում։ Դրանցից ավելի քան 9 միլիոնը կապված են այն հանգամանքի հետ, որ բորսան նորից օգտագործել է օգտատերերի հին անձնագրային լուսանկարները՝ փոխանակ պահանջելու թարմ փաստաթղթեր՝ ըստ օրենսդրության պահանջի։
Չնայած այն բանին, որ FIU-ն արդեն կասեցրել է բորսայի որոշ գործառույթներ և կիրառել է կարգապահական միջոցներ աշխատակիցների նկատմամբ, տուգանքը դեռևս պաշտոնապես նշանակված չէ։ Մին Բյոն Դոկը պնդում է, որ պատժամիջոցները պետք է համապատասխանի օրենսդրությանը, ըստ որի յուրաքանչյուր խախտման համար կարող է սահմանվել մինչև 100 միլիոն վոն (ավելի քան 70 հազար դոլար) տուգանք։
Upbit-ի KYC պահանջներին համապատասխանության հարցը առաջին անգամ չէ, որ քննարկվում է։ Դեռ 2024թ. նոյեմբերին վերահսկիչները հաղորդել էին հարյուր հազարավոր դեպքերի մասին, երբ հաճախորդների ներկայացրած փաստաթղթերը անընթեռնելի էին։ Այդ ժամանակ տուգանքի հնարավոր չափը գնահատվում էր 43 միլիարդ դոլար։ Հետաքննությունը շարունակվում է մինչ օրս։
Upbit-ը Հարավային Կորեայի խոշորագույն կրիպտոբորսան է, իսկ կրիպտոարժույթների առևտրի ծավալը կորեական վոնով համեմատելի է դոլարով կատարվող առևտրի հետ (առանց հաշվի առնելու USDT-ի նման սթեյբլքոյնների գործարքները), ինչի արդյունքում Հարավային Կորեան համարվում է աշխարհում երկրորդ ամենախոշոր կրիպտոշուկան։
Բաժանորդագրվեք մեր ալիքին Telegram-ում
