Ֆրանսիան հետաքննում է Իլոն Մասկի սոցիալական ցանցը

Ֆրանսիայի իրավապահ մարմինները հետաքննում են միլիարդատեր Իլոն Մասկի X սոցիալական ցանցը՝ արտաքին միջամտությունը խթանելու համար մանիպուլյացիաների մասին բողոքներից հետո, հաղորդում է Le Figaro-ն։

Փարիզի դատախազությունը ուրբաթ օրը հաստատել է, որ հուլիսի 9-ին իր կիբերհանցագործությունների դեմ պայքարի ստորաբաժանումը հետաքննություն է սկսել X-ի և դրա ղեկավարների նկատմամբ, որոնք կասկածվում են հարթակի ալգորիթմը արտաքին միջամտությունը խթանելու համար մանիպուլյացիաներ կատարելու մեջ։

Գործակալությունը հավելել է, որ Ազգային ժանդարմերիան հետաքննելու է X-ը որպես իրավաբանական անձ և այն ղեկավարող «ֆիզիկական անձանց»։

Խոսքը, մասնավորապես, վերաբերում է այնպիսի հանցագործությունների, ինչպիսիք են կազմակերպված խմբի կողմից ավտոմատացված տվյալների մշակման համակարգի խափանումը, ինչպես նաև կազմակերպված խմբի կողմից ավտոմատացված տվյալների մշակման համակարգից տվյալների անօրինական հեռացումը։

Փարիզի դատախազությունը պարզաբանել է, որ հետաքննությունը սկսվել է տարվա սկզբին ստացված երկու հաղորդագրություններից, որոնք «ցույց են տվել X ալգորիթմի հնարավոր օգտագործումը արտաքին միջամտության նպատակով»։ X հարթակի վերաբերյալ մի քանի հետաքննություններ են ընթանում Եվրամիության մակարդակով՝ 2023 թվականի դեկտեմբերից ի վեր՝ «Թվային ծառայությունների մասին» օրենքի (DSA) համաձայն։