Ճապոնական Toyota Motor Corporation-ը գնահատել է Ռուսաստանում ավտոմեքենաների արտադրության դադարեցման հետ կապված ծախսերը 97 միլիարդ իեն (655 միլիոն դոլար):
Նրանց կողմից հրապարակված փաստաթղթում ասվում է, որ Toyota Motor Corporation-ը որոշել է դադարեցնել տրանսպորտային միջոցների արտադրությունը Ռուսաստանի Սանկտ Պետերբուրգի Toyota գործարանում, որի ֆինանսական ազդեցությունը 96,986 միլիոնով արտացոլված է 2023 ֆինանսական տարվա առաջին կիսամյակի ծախսերում: Այս գումարը ներառում է նաև ակտիվների արժեզրկումը:
Ավտոարտադրողի համաշխարհային եկամուտը կազմել է 17,709 տրիլիոն իեն (119,5 միլիարդ դոլար), ինչը 14,4 %-ով ավելի է նախորդ ֆինանսական տարվա նույն ժամանակահատվածի համեմատ: Գործառնական շահույթը նվազել է 34,7%-ով և կազմել 1,14 տրլն իեն (7,7 մլրդ դոլար)։
Ընկերությունն այս ֆինանսական տարվա համար (ավարտվում է 2023 թվականի մարտ) իր արտադրության թիրախը 9,7 միլիոնից իջեցրել է 9,2 միլիոն միավորի։ Ընթացիկ ֆինանսական տարվա վերջում Toyota-ն կանխատեսում է 36 տրիլիոն իեն (242,8 միլիարդ դոլար) եկամուտ: Գործառնական շահույթը ակնկալվում է 2,4 տրլն իենի (16,2 միլիարդ դոլար) չափով, ինչը պակաս է վերլուծաբանների կանխատեսումից՝ 2,98 տրլն իեն (20,1 միլիարդ դոլար):
Toyota Motor Corporation-ի բաժնետոմսերը Տոկիոյի ֆոնդային բորսայում ֆինանսական արդյունքների հրապարակումից հետո էժանացել են 1,94%-ով, մինչդեռ Nikkei 250-ինը աճել է 0,33%-ով:
2022 թվականի մարտին Toyota-ն դադարեցրեց ավտոմեքենաների արտադրությունը Ռուսաստանում՝ պատժամիջոցների ֆոնին ներկրվող մասերի գնման դժվարությունների պատճառով։
Սեպտեմբերին ընկերությունը հայտարարեց Ռուսաստանում ավտոգործարանը փակելու իր որոշման մասին՝ բաղադրիչների կանոնավոր մատակարարումները վերականգնելու անհնարինության պատճառով:
Սանկտ Պետերբուրգի Շուշարի արդյունաբերական գոտում Toyota-ի արտադրությունը սկսվել է 2007 թվականին, 2021 թվականին գործարանում արտադրվել է 80800 Camry և RAV4 մոդել։
Բաժանորդագրվեք մեր ալիքին Telegram-ում
