Ցուկերբերգին դուրս են շպրտել Օվալաձև սենյակից

NBC-ն հաղորդում է, որ Meta-ի հիմնադիր Մարկ Ցուկերբերգին խնդրել են դուրս գալ Սպիտակ տան Օվալաձև սենյակից փակ հանդիպման ժամանակ։

ԱՄՆ նախագահի վարչակազմը հերքում է դա։

Հեռուստաալիքի աղբյուրների համաձայն, ռազմական պաշտոնյաները հանդիպել են ԱՄՆ նախագահ Դոնալդ Թրամփի հետ՝ քննարկելու նոր F-47 աննկատ կործանիչը։ Սակայն, որոշ պահի Ցուկերբերգը անսպասելիորեն մտել է գրասենյակ։ Հաշվի առնելով, որ նա հասանելիություն չունի գաղտնի տեղեկատվությանը, պաշտոնյաները խնդրել են գործարարին սպասել դրսում։

Պնդվում է, որ հանդիպման ժամանակ գրասենյակ է մտել նաև երիտասարդ օգնականը, նախագահին ինչ-որ բան ցույց տվել իր նոութբուքում և հեռացել։ NBC-ն գրում է, որ զինծառայողները «սպասում էին ավելի շատ գաղտնիություն գլխավոր հրամանատարի հետ հանդիպման ժամանակ», և նրանցից մի քանիսը հանդիպումից դուրս են եկել «շփոթված և մի փոքր նյարդային», որոնցից մեկը մտածում էր, թե արդյոք պետք է անհանգստանան տեղեկատվության արտահոսքի հնարավորության համար։

Սպիտակ տան անանուն բարձրաստիճան պաշտոնյան New York Post-ին ասել է, որ Մարկ Ցուկերբերգին չեն դուրս շպրտել Օվալաձև սենյակից։

«Նրան չեն խնդրել հեռանալ։ Նա նախագահի խնդրանքով այցելել է նրան ողջունելու, ապա գնացել է սպասելու իր հանդիպմանը… որը պետք է տեղի ունենար դրանից հետո», — վստահեցրել է պաշտոնյան։

Մարտին Դոնալդ Թրամփը Boeing-ին հանձնարարել է մշակել F-47 վեցերորդ սերնդի գաղտնի կործանիչը՝ NGAD (Next-Generation Air Dominance) ծրագրի շրջանակներում։ Սակայն լրատվամիջոցները գրել են, որ ինքնաթիռի նախագիծը կարող է մնալ առանց բյուջեի՝ բարձր արժեքի պատճառով. այն սկզբնապես գնահատվել է 350 միլիոն դոլար։