ԱՄՆ նախագահ Դոնալդ Թրամփը հայտարարել է, որ Միացյալ Նահանգները անհապաղ դադարեցնում է Կանադայի հետ բոլոր առևտրային բանակցությունները՝ կապված երկրի կողմից թվային ծառայությունների հարկի սահմանման հետ, որը ազդում է ամերիկյան տեխնոլոգիական ընկերությունների վրա։
«Մենք հենց նոր իմացանք, որ Կանադան, որի հետ արդեն չափազանց դժվար է առևտուր անել, այդ թվում՝ մեր կաթնամթերքի վրա տարիներ շարունակ մինչև 400% սակագներ սահմանելով, թվային ծառայությունների հարկ է սահմանել մեր տեխնոլոգիական ընկերությունների վրա։ Սա մեր երկրի վրա ուղղակի և բացահայտ հարձակում է», — գրել է Սպիտակ տան ղեկավարը իր Truth Social սոցիալական ցանցում։
Նրա խոսքով՝ Կանադան կրկնօրինակում է Եվրամիության գործողությունները, որը նույնպես քննարկում է Միացյալ Նահանգների վրա նմանատիպ հարկ սահմանելու հնարավորությունը։
«Դրա հիման վրա մենք անմիջապես դադարեցնում ենք Կանադայի հետ բոլոր առևտրային քննարկումները։ Մենք Կանադային կտեղեկացնենք այն սակագնի մասին, որը նա պետք է վճարի Միացյալ Նահանգների հետ գործարքներ կնքելու համար՝ առաջիկա յոթ օրվա ընթացքում», — ընդգծել է Թրամփը։
