«Ռոսատոմ» պետական կորպորացիան ընտրվել է Ղազախստանում առաջին ատոմակայանի կառուցման կոնսորցիումի ղեկավար։ Այս մասին հունիսի 14-ին հաղորդվել է Ղազախստանի ատոմային էներգիայի գործակալության կայքում։
Նշվում է, որ կատարված աշխատանքների արդյունքների հիման վրա պոտենցիալ մատակարարների կարճ ցուցակում ընդգրկվել են «Ռոսատոմ»-ը (Ռուսաստան), «Չինաստանի ազգային միջուկային կորպորացիա»-ն (Չինաստան), «Ֆրանսիայի էլեկտրաէներգիա» (Ֆրանսիա) և «Կորեայի հիդրո և միջուկային էներգիա» (Հարավային Կորեա) ընկերությունները։ Ռուսական ընկերությունը ներկայացրել է ամենաօպտիմալ և շահավետ առաջարկը։
«Այսպիսով, «Ռոսատոմ»-ը որոշվել է որպես Ղազախստանում առաջին ատոմակայանի կառուցման նախագծի միջազգային կոնսորցիումի ղեկավար։ Ներկայումս, «Ռոսատոմ»-ի առաջարկներին համապատասխան, սկսվել է Ռուսաստանի Դաշնության հաշվին պետական արտահանման ֆինանսավորում ներգրավելու հարցը», — ասվում է հաղորդագրության մեջ։
