Հունգարիան և Սլովակիան մտադիր են դեմ լինել Եվրահանձնաժողովի նախաձեռնությանը՝ դադարեցնելու Ռուսաստանից գազի, նավթի և միջուկային վառելիքի գնումը։ Երկու երկրներն էլ կքվեարկեն այս որոշման դեմ հունիսի 16-ին՝ Լյուքսեմբուրգում կայանալիք հանդիպման ժամանակ։
Այս մասին հայտնել է Հունգարիայի արտաքին գործերի նախարար Պետեր Սիյարտոն Facebook-ում։
Սիյարտոն բանակցություններ է վարել Սլովակիայի արտաքին գործերի նախարար Յուրի Բլանարի հետ, որից հետո կողմերը համաձայնության են եկել ընդհանուր դիրքորոշման շուրջ։ Նրանց կարծիքով, ռուսական էներգետիկ ռեսուրսներից հրաժարվելը «ինքնիշխանության կոպիտ խախտում է»։ Սիյարտոն ընդգծել է, որ էներգետիկ քաղաքականության հարցերը պետությունների ներքին գործն են, և Բուդապեշտը չի համաձայնվում առկա էներգետիկ աղբյուրները փոխարինել ավելի թանկ այլընտրանքներով՝ «ոչ Բրյուսելի, ոչ էլ Կիևի համար»։
Հունգարիայի արտաքին գործերի նախարարության ղեկավարը նաև ասել է, որ հունգարական պատվիրակությունը «կպաշտպանի հունգարական ընտանիքներին» կոմունալ ծառայությունների սակագների բարձրացումից։ Նա ռուսական մատակարարումներից հնարավոր հրաժարումը անվանել է «Վոլոդիմիր Զելենսկու շանտաժ»։
Ավելի վաղ Կիևի և Բուդապեշտի միջև դիվանագիտական հակամարտություն է սկսվել։ «Վալասզ Օնլայն»-ին տված հարցազրույցում Ուկրաինայի նախագահ Վլադիմիր Զելենսկին մեղադրել է
Հունգարիայի իշխանություններին Ուկրաինայի ներքին գործերին միջամտելու և պատերազմը քաղաքական նպատակներով օգտագործելու մեջ։ Ի պատասխան՝ պաշտոնական Բուդապեշտը հայտարարել է Կիևի կողմից «հունգարական ընդդիմության համար քարոզչության» մասին։ Ուկրաինայի արտաքին գործերի նախարարությունն, իր հերթին, մեղադրել է Հունգարիային՝ երևակայական թշնամիներ փնտրելու մեջ։
Բաժանորդագրվեք մեր ալիքին Telegram-ում
