Թրամփը հայտարարել է Չինաստանի հետ համաձայնության գալու մասին

Նախագահ Դոնալդ Թրամփը չորեքշաբթի օրը հայտարարել է, որ Չինաստանի հետ գործարքը կայացել է․ լուծվել են փոխադարձ ներմուծման մաքսատուրքերի հարցում եղած տարաձայնությունները, ինչպես նաև կողմերը համաձայնության են եկել, որ Պեկինը կմատակարարի ԱՄՆ-ին հազվագյուտ հողային միներալներ, իսկ Վաշինգտոնը նորից թույլ կտա չինացի ուսանողներին սովորել ամերիկյան համալսարաններում։

«Մենք ստանում ենք 55%, իսկ նրանք՝ 10%։ Հիանալի հարաբերություններ են», — գրել է Թրամփը Truth Social սոցիալական ցանցում՝ ըստ ամենայնի նկատի ունենալով համաձայնեցված մաքսատուրքերի մակարդակը։

Թրամփը նշել է, որ գործարքը դեռ պետք է վերջնական հաստատում ստանա իր և ՉԺՀ նախագահ Սի Ցզինպինի կողմից։

Երկուշաբթի և երեքշաբթի Լոնդոնում կայացած ինտենսիվ երկօրյա բանակցություններից հետո ԱՄՆ և Չինաստանի պատվիրակությունները համաձայնեցրել են հիմնական պայմանները՝ առևտրային զինադադարի վերականգնման և Չինաստանից հազվագյուտ հողային մետաղների արտահանման սահմանափակումների վերացման վերաբերյալ, հայտնում է Reuters-ը։

ԱՄՆ առևտրի նախարար Հովարդ Լյութնիկը, որը գլխավորել է պատվիրակությունը Լոնդոնում, հայտարարել է, որ չինական հազվագյուտ հողային միներալների և մագնիսների մատակարարման սահմանափակումների կարգավորումը գործարքի հիմնարար բաղադրիչն է։

«ԱՄՆ-ն մի շարք միջոցներ էր կիրառել մատակարարումների դադարեցման ժամանակ, — ասել է Լյութնիկը։ — Այժմ սպասվում է դրանց չեղարկումը… փոխադարձ հիմքի վրա»։

Չինաստանի առևտրի փոխնախարար Լի Չենգանը առանձին բրիֆինգի ժամանակ հաստատել է, որ սկզբունքային համաձայնություն է ձեռք բերվել առևտրային մեխանիզմի վերաբերյալ, որը կուղարկվի երկու երկրների ղեկավարների հաստատմանը։

Կողմերը ժամանակ ունեն մինչև օգոստոսի 10-ը՝ ավելի համապարփակ համաձայնագիր կնքելու համար, հակառակ դեպքում մաքսատուրքերը կվերադարձվեն նախկին մակարդակին՝ շուրջ 145%՝ Չինաստանից ԱՄՆ ներմուծման համար և 125%՝ ԱՄՆ-ից Չինաստան արտահանման համար՝ ներկայիս 30%–ի և 10%–ի փոխարեն համապատասխանաբար։