Հարվարդը պահանջել է դատարանի միջոցով վերականգնել բուհի ֆինանսավորումը

Հարվարդի համալսարանը դիմել է դատարան՝ խնդրելով ապասառեցնել ԱՄՆ վարչակազմի կողմից սառեցված 2.5 մլրդ դոլարի ֆինանսավորումը՝ ամենահին համալսարանի դեմ նման գործողությունները անվանելով անօրինական։ Այս մասին հաղորդել է Reuters-ը։

ԱՄՆ վարչակազմի դեմ Բոստոնի ԱՄՆ շրջանային դատարան Հարվարդի ներկայացրած հայցի համաձայն՝ ապրիլի 14-ից ի վեր համալսարանը ստացել է 957 կարգադրություն՝ ազգային անվտանգությանը սպառնացող վտանգների, քաղցկեղի բուժման եւ վարակիչ հիվանդությունների հետ կապված հետազոտությունների ֆինանսավորումը սառեցնելու մասին։ Համալսարանի բողոքի ակցիաները կապված են այն բանի հետ, որ համալսարանը մերժել է Սպիտակ տան պահանջները, նշվել է փաստաթղթում։

Խոսքը, մասնավորապես, վերաբերում է ՄԻԱՎ հետազոտությունների ոլորտում եւ պաշտպանության նախարարությունում կենսաբանական սպառնալիքների մասին իրազեկվածության բարձրացմանն ուղղված դրամաշնորհների կրճատմանը: Հարվարդը նշել է, որ ֆինանսավորման կրճատումը «կքայքայի հանրային առողջապահության հիմնական ոլորտներում իրականացվող հետազոտությունները»:

Թրամփը եւ նրա վարչակազմը բազմիցս հայտարարություններ են արել Հարվարդի եւ այլ հեղինակավոր ամերիկյան համալսարանների մասին՝ ասելով, որ համալսարանը չի կարող լիովին ապահովել հրեա ուսանողների անվտանգությունը, որոնց սպառնում են պաղեստինամետ ակտիվիստները, որոնք դեմ են Իսրայելի ռազմական գործողություններին Գազայի հատվածում։

Ավելի վաղ ԱՄՆ առողջապահության եւ մարդկային ծառայությունների նախարարությունը չեղարկել էր Հարվարդի համար նախատեսված 60 մլն դոլարի դաշնային դրամաշնորհները, քանի որ, նախարարության կարծիքով, համալսարանը չի կարողանում լուծել հակասեմականությունը, էթնիկ եւ ռասայական խտրականության խնդիրները։ ԱՄՆ նախագահ Դոնալդ Թրամփի վարչակազմի քննադատության կենտրոնում էր նաեւ դրական գործողությունների բացահայտ եւ անուղղակի քաղաքականությունը, որը որոշակի դեպքերում ենթադրում է ռասայական փոքրամասնությունների անդամներին արտոնություններ տրամադրելը ընդունելության համար դիմելիս։