ԱՄՆ-ի հեղինակությունը փլուզվել է Թրամփի օրոք

ԱՄՆ-ի միջազգային կերպարը վատացել է Դոնալդ Թրամփի իշխանության գալուց հետո, մինչդեռ Չինաստանի նկատմամբ վերաբերմունքը, ընդհակառակը, զգալիորեն բարելավվել է։

Այս մասին հաղորդում է Axios պորտալը՝ հղում անելով Morning Consult-ի կողմից անցկացված համաշխարհային ուսումնասիրությանը։

Վերջին մեկուկես տարվա ընթացքում 41 երկրներում հավաքված տվյալների համաձայն՝ ԱՄՆ վարկանիշը սկսել է արագորեն անկում ապրել Թրամփի երդմնակալությունից հետո։ Հատկապես կտրուկ անկում է նկատվել այն բանից հետո, երբ ամերիկացի նախագահը հայտարարել է ներմուծման մաքսատուրքերի ներդրման մասին, ինչը մտահոգություններ է առաջացրել նոր առևտրային պատերազմի ռիսկի ֆոնին։

Երկրների նկատմամբ վերաբերմունքի ինդեքսը հաշվարկվում է որպես դրական և բացասական արձագանքների տարբերություն։ Մայիսին ԱՄՆ վարկանիշը դարձել է բացասական, մինչդեռ Չինաստանի վարկանիշը դարձել է դրական՝ 2020 թվականի հոկտեմբերից ի վեր առաջին անգամ, և մայիսի 30-ի դրությամբ հասել է +8.8-ի՝ ԱՄՆ-ի -1.5-ի դիմաց։

«2025 թվականի հունվարից ի վեր երկրների մեծ մասը միաժամանակ գրանցել է ԱՄՆ-ի նկատմամբ վերաբերմունքի վատթարացում և Չինաստանի ընկալման բարելավում», — ասել է Morning Consult-ի վերլուծաբան Ջեյսոն Մաքմանը։

Ռուսաստանը մնում է բացառություն. այստեղ, ընդհակառակը, ԱՄՆ-ի նկատմամբ վերաբերմունքը բարելավվել է: Սակայն, ընդհանուր առմամբ, ԱՄՆ հեղինակության անկումը կարող է ազդել նաև տնտեսության վրա, քանի որ ամբողջ աշխարհի սպառողները սկսում են խուսափել ամերիկյան ապրանքներից և ապրանքանիշերից: Morning Consult-ը նաև ԱՄՆ հեղինակության վատթարացումը կապում է այսպես կոչված «ազատագրման օրվա» հետ. մարտի 2-ին Թրամփը հայտարարեց ներմուծման մեծածավալ մաքսատուրքերի մասին, ինչը բացասական արձագանք առաջացրեց աշխարհում և վերջապես «շրջեց միտումը» Չինաստանի օգտին: