Թրամփի ընտանիքը վաստակում է ավելի շատ, քան ԱՄՆ պատմության մեջ որևէ այլ առաջնորդ

ԱՄՆ նախագահ Դոնալդ Թրամփի ընտանիքը ռեկորդային ֆինանսական օգուտներ է ստացել նրա պաշտոնավարման ընթացքում, հաղորդում է The New York Times-ը։

Հրատարակության տվյալներով՝ Դոնալդ և Մելանյա Թրամփերը միայն կրիպտոարժույթներից և մեմքոյններից վաստակել են 320 միլիոն դոլար։ Սա չի ներառում արտասահմանյան անշարժ գույքը և Վաշինգտոնի էլիտար ակումբը, որի անդամակցությունն արժե 500 հազար դոլար։

Թերթը նաև հիշատակում է Ջեֆ Բեզոսի առաջարկը՝ Մելանյա Թրամփի մասին 28 միլիոն դոլարով ֆիլմ նկարահանելու, ինչպես նաև Կատարի կառավարության կողմից տրված նվերը՝ 200 միլիոն դոլար արժողությամբ անձնական Boeing 747: Սա ճանաչվել է որպես ԱՄՆ պատմության մեջ ամենաթանկ նվերը։

NYT-ը նշում է, որ Թրամփը նորմալ է դարձրել այն, ինչը նախկինում կարող էր քաղաքական սկանդալ առաջացնել։ Նա, ըստ հրապարակման, վերացրել է վերահսկողության և էթիկայի մեխանիզմները, ազատել է աշխատանքից կառավարության տեսուչներին և ուժեղացրել է վերահսկողությունը Կոնգրեսի, դատարանների և ՀԴԲ-ի նկատմամբ։

Սպիտակ տունը պնդում է, որ Թրամփը հաջողակ գործարար է եղել իր ընտրվելուց շատ առաջ և չի օգտագործում իր պաշտոնը եսասիրական նպատակներով։ Նշվում է նաև, որ նա շարունակում է շահույթ ստանալ որդիների բիզնեսներից։

Ըստ NYT-ի՝ Թրամփների ընտանիքի ընդհանուր կարողությունը 2025 թվականի մարտին հասել է 5.1 միլիարդ դոլարի, ինչը 1.2 միլիարդ դոլարով ավելի է նախորդ տարվա համեմատ։